Turistët në Qerret, pre e vjedhjeve nga “grabitësit e natës”. Policia e gjunjëzuar

Nga Boldnews.al

Turizmi bregdetar shqiptar, i goditur rëndë për shkak të pandemisë Covid-19, po tronditet së fundmi edhe nga shumëfishimi i rasteve të vjedhjeve ndaj pasurisë së turistëve, ndërkohë që Policia e Shtetit duket e gjunjëzuar përballë “skifterëve të natës”.

Në zonën turistike të Qerretit, vetëm gjatë ditëve të para të muajit Gusht, është shënuar rritje e ndjeshme e rasteve të grabitjes së sendeve me vlerë dhe parave të personave që kanë zgjedhur të pushojnë në bregdetin e Kavajës.

“Boldnews.al” ka marrë sinjalizime për vjedhje të shumta, sidomos apartamentet që ndodhen në kompleksin rezidencial “ADA”.

Skenari i vjedhjes është thuajse i ngjashëm në të gjithë rastet. Hajdutët shfrytëzojnë orët e vona të natës për t’u futur në banesat e pushuesve, ndërkohë që ata janë në gjumë.

Pre e grabitjes kanë rënë gjithçka që konsiderohet me vlerë prej hajdutëve-para, ora, byzylykë, telefona, lap-topë, etj.

“Boldnews.al” ka mësuar se në disa raste, gjithësesi sporadike, banorët janë konfrontuar me grabitësit, të cilët kishin mësyrë në apartamentet e tyre, duke rrezikuar jo vetëm humbjen e sendeve me vlerë, por edhe shëndetin.

LEXO EDHE  Granata pranë banesës së ish-komandatit të FNSH-së, ja çfarë thotë policia

Gjithësesi, përtej shtimit të rasteve të grabitjeve, të shoqëruara me një rritje të numrit të kallëzimeve penale, deri më tani nuk duket të ketë asnjë reagim serioz nga ana e Policisë së Shtetit.

Pushuesit në Qerret deklarojnë për redaksinë se, pavarësisht se kanë kallëzuar jo vetëm grabitjet, por edhe lëvizjet e dyshimta të personave të ndryshëm në zonë, nga ana e uniformave blu të Kavajës nuk ka pasur asnjë lloj mase konkrete, duke zhgënjyer qytetarët, të cilët presin mbrojtje nga strukturat shtetërore.

Situata e rëndë me grabitjet, sidomos në kompleksin “ADA”, ku ka një banesë edhe shkrimtari i njohur Ismail Kadare, ka shtuar frikën e pushuesve edhe në qendrat e tjera rezidenciale të zonës, “Laguna Blu” dhe “Marea”.