Kryetari i PD, Lulzim Basha, ka vizituar familjen Barruku në fshatin Kameras të Manzës, e cila jeton në çadër për shkak se shtëpia është dëmtuar nga tërmeti.
I zoti i shtëpisë i ka treguar çadrën kryetarit të PD-së dhe tha se edhe pse shtëpia është dëmtuar nga tërmeti, atë e kanë skualifikuar nga marrja e ndihmës.
“Unë i kërkoj vetëm diçka qeverisë, – tha Barruku– që të dalë vetë Kryeministri me ministrin e Rindërtimit dhe të na sqarojë sa banesa kanë rregulluar në këto 9 muaj.
Të na e bëjnë këtë transparente e të thonë që bëmë këtë dhe ndaj ju lamë juve pas dore. Por asgjë nuk kanë bërë.
Është tepër e thjeshtë: a ia dha bota, ndihmën? Urdhëra, sa ëhstë familja e Kadriut? Gjashtë vetë iu takon 5 lekë! Dakord, kaq janë mundësitë.
Dhe këtu nuk ka ujë. Asnjë pikë ujë. Jetojmë me puse, me të blerë….Kjo është gjendja në të cilën jeton populli! Popullit i kanë vënë këmbën përsipër!”, tha Kadri Barruku.
Kreu demokrat ka bërë një premtim për të gjithë ata që u prekën nga tërmeti dhe që nuk kanë marrë apo iu është refuzuar mbështetja financiare nga qeveria:
“Shtëpia e shkatërruar prej 26 nëntorit 2019, jeton me gruan në çadër dhe të thonë se je skualifikuar për ndihmë!!! Por e kam dëgjuar këtë nga disa prej banorëve jo vetëm të kësaj zone. Ky është një korrupsion që fillon që nga kryepleqtë këtu dhe vazhdon deri në bashki e qëveri. E do t’u them sot, meqë po ma përsërit këtë histori Kadri, se korrupsioni dhe vjedhja që po bëjnë me fondet e tërmetit, nuk ka për të shpëtuar asnjëri prej tyre.
Peshqit e mëdhenj në Tiranë po se po, por dhe këta këtu që tallen me ju për të marrë ryshfet e ju bëjnë që të bëni letrat nga disa herë se “ju mungon kjo e ju mungon ajo” ta dinë se në listë do të japin llogari nga i pari deri tek i fundit. Këta që sillen si militantë apo që janë të të korruptuar deri në palcë dhe ju bëjnë zbor, jua bëjnë malore, për ta kualifikuar këtë banesë, këtë gërmadhë, që një e nga një, do të japin përgjigje para ligjit dhe për këtë ke fjalën time”, u shpreh Basha.
