Policia e Elbasanit ka arrestuar dy persona lidhur me vrasjen e shtetasit Regis Runaj, ngjarje e ndodhur më 29 korrik. Të arrestuarit mësohet se janë Xhulion Hoxha, 29 vjeç dhe Euglen Halili, 23 vjeç.
Përmes një deklarate, policia tha se ka finalizuar operacioni policor i koduar “Shkumbini”, ku në bashkëpunim me FNSH dhe RENEA-n, u bë e mundur kapja dhe prangosja e dy shtetasve, si autorë të dyshuar të kësaj ngjarjeje, konkretisht:
Xh. H., 29 vjeç dhe E. H., 23 vjeç, të dy banues në Elbasan.
Nga veprimet hetimore dhe profesionale të kryera ka rezultuar se viktima, mbrëmjen e ngjarjes ka qenë në shoqërinë e dy autorëve të dyshuar dhe pasi kanë konsumuar lëndë narkotike, në një park në afrësi të varrezave të qytetit, janë drejtuar për në qytetin e Elbasanit.
Në afërsi të varrezave, shtetasi E. H. e ka goditur shtetasin Regis Runaj, një herë me thikë nga mbrapa shpinës dhe më pas e ka goditur edhe 26 herë të tjera duke i shkaktuar vdekjen e menjëhershme.
Gjatë periudhës hetimore, nga grupi hetimor janë gjetur dhe sekuestruar prova shkencore që provojnë autorësinë e kësaj ngjarjeje.
“Në cilësinë e provës materiale janë sekuestruar një motomjet, në të cilin u gjetën njolla gjaku, të cilat pas egzaminimit në laboratorin shkencor rezultuan se i përkasin viktimës, si dhe një shumë eurosh dhe prova të tjera ligjore.
Nga hetimet intensive ka rezultar se këta dy shtetas janë të përfshirë edhe në vrasjen e shtetasit Emiljano Ramazanit, ndodhur më datë 20 korrik 2020 në qytetin e Elbasanit, pasi nga provat e grumbulluara rezulton se të dy këta shtetas kanë ndjekur dhe kontrolluar lëvizjet e viktimës.
Po nga hetimet rezulton se këta shtetas, këto ngjarje i kanë kryer kundrejt pagesës nga persona të tjerë, për të cilët vijon puna intensive për dokumentimin me prova ligjore, kapjen dhe arrestimin e tyre”, thuhet në njoftimin zyrtar.
Materialet i kaluan Prokurorisë së Rrethit Gjyqësor Elbasan, për veprën penale “Vrasja me paramendim” e kryer në bashkëpunim.
