Ish-deputeti i LSI-së, Përparim Spahiu, ka analizuar koncesionet e dhëna te kompanitë private për sektorë të ndryshëm të shëndetësisë.
Sipas tij, 311 milion euro për 10 vjet janë kostot për vendimet e qeverisë që jep koncesione tek kompanitë private.
Teksa përmend edhe thirrjen e Presidentit Ilir Meta ndaj qeverisë për më shumë buxhet për manaxhimin e situatës nga Covid-19, ai thotë se ”kërkohen më shumë para atje ku janë “hedhur” miliona euro. Kjo quhet thjesht abuzim dhe është normale, kur drejtohesh nga një bandë financiare e jo qeveri”.
Reagimi i ish-deputetit
311 milion euro për 10 vjet kostot e dhënies me konçension kompanive private. 2.1 milion euro fitim për 2018-n raporton kompania Sani Servise e cila ofron shërbimin e sterilizimit të instrumentave kirurgjikale (kostot e sterilizimit kalojnë ato të ndërhyrjeve kirurgjikale, nonsens i madh sipas ekspertëve).
731 mijë euro fitime raporton kompania 3P LifeLogistic e cila ofron shërbimin e Check-Up. Kontratë që do të zgjasë 10 vjet ku taksapaguesit do ti paguajnë 54 milion euro edhe nëse nuk bëhet asnjë analizë.
Kompania DiaVita, e cila ofron shërbimin e dializës realizoi 381 mijë euro. Pra janë miliona euro të investuara në shëndetësi por qartazi duket se janë miliona euro të investuara për tu vjedhur pasi të gjithë shohim vështirësitë që ka sektori në manaxhimin e situatës.
Presidenti kërkoi dje më shumë buxhet, më shumë para, për manaxhimin e situatës së rëndë dhe me të drejtë, pasi jetët njerëzore janë dhe duhet të jenë prioritet. Pra, kërkohen më shumë para atje ku janë “hedhur” miliona euro. Kjo quhet thjesht abuzim dhe është normale, kur drejtohesh nga një bandë financiare e jo qeveri.
