Në kulmin e kurbës së COVID-19, ditën e sotme mbahen zgjedhjet për Rektorët dhe Dekanët e Universiteteve shtetërore.
Në Tiranë për Rektorin e ri janë në garë kandidatët Artan Hoxha nga Fakulteti Juridik, Kozeta Sevrani nga Fakultetit Ekonomik dhe Mimoza Hafizi nga Fakulteti i Shkencave të Natyrës. Paralelisht në të gjitha fakultetet e univerisitetit, po zhvillohen dhe garat për dekanë.
Zgjedhjet e 30 korrikut janë kundërshtuar nga shumë grupime studentësh dhe pedagogësh të cilat i konsiderojnë ato të paligjshme pasi po zhvillohen në kohën e pandeminë dhe pjesa më e madhe e studentëve që duhet të votojnë, janë nëpër rrethe për shkak të mbylljes së shkollës.
Së fundmi grupimi Qendresa Qytetare, i themeluar nga një grup studentësh, i ka kërkuar Presidentit Meta që të mos dekretojë fituesit që dalin nga kjo garë e paligjshme.
Sipas tyre, caktimi i datës së zgjedhjeve nga Ministrja e Arsimit Shahini është bërë në mungesë të konsultimit me Konferencën e Rektorëve.
Gjithashtu ata argumentojnë se fillimi i procesit zgjedhor në datë 30 Qershor dhe përfundimi i tij më 30 Korrik krijon një situatë të rëndë paligjshmërie në universitetet publike, pasi çdo universitet publik e ka të pamundur që të mbyllë procesin zgjedhor brenda afatit një mujor, pa shkelur rregulloren e zgjedhjeve.
Por më kryesorja sipas tyre, zhvillimi i zgjedhjeve më 30 Korrik përjashton tre të pestat e studentëve nga e drejta ligjore për të zgjedhur dhe për t’u zgjedhur në organet drejtuese të universiteteve publike.
