Nga Boldnews.al
Prokuroria Speciale, SPAK, riktheu dosjen “339” në vëmendjen e opinionit, në një mënyrë jo fort komode.
Në fillim të kësaj jave, u njoftua se prokuroria kishte lëshuar urdhër-arreste për 22 komisionerë të rëndomtë të zgjedhjeve të përgjithshme të vitit 2017, ndërkohë që publiku tashmë ka mësuar prej kohësh se brenda atij hetimi gjenden përgjimet e zyrtarëve të lartë të pushtetit të Partisë Socialiste, përfshirë ish-kryebashkiakun e Durrësit, Vangjush Dako.
Më pas u mësua se 22 komisionerët kishin një shpërndarje thuajse të barabartë përkatësie politike, duke krijuar idenë se të gjithë formacionet partiake kanë manipuluar votat.
Ambasadorja Amerikane Kim, Yuri Kim, e konsideroi këtë zhvillim, si një gur të rëndësishëm në vendosjen e shtetit ligjor në Shqipëri.
Më tej, u mësua se 2 nga 22 komisionerët, për të cilët u lëshuan urdhër-arrestet, prej dy vitesh janë larguar nga kjo botë, me shumë mundësi për shkaqe natyrale.
Ambasadorja Kim, me shumë mundësi, vijon t’i qëndrojë faktit se ky hetim është “gur” i rëndësishëm, megjithëse mbi dy prej “të arrestuarve” tashmë, fatkeqësisht për ta dhe familjarët e tyre, qëndron “guri i varrit”.
Ndërkohë, drejtuesi i SPAK-ut, Arben Kraja, është cituar në media të shprehet se hetimet janë zhvilluar në sekret të plotë dhe nuk janë kryer verifikime në terren për personat nën hetim, për shkak të dekonspirimit.
Për këtë arsye, citohet Kraja, prokurorët nuk kanë qenë në dijeni se dy prej komisionerëve kanë vdekur “para dy muajsh”, siç është shprehur ai.
Ky zhvillim atipik nxiti juristët dhe njohësit e zhvillimeve penale në Shqipëri të krijojnë të paktën 3 insinuata mbi ngjarjen.
Skenari i parë – Prokuroria SPAK tashmë ka krijuar bindjen, bazuar në prova, për përgjegjësinë penale të komisionerëve të zgjedhjeve të vitit 2017 dhe lëshoi ndaj tyre urdhër-arrestet.
Sipas këtij skenari, SPAK duket se nuk ka kryer asnjë veprim për rreth dy vjet, as kur ishte në detyrë Prokuroria për Krime të Rënda dhe as në 7 muajt e fundit që ka nisur funksionimin SPAK-u.
Gjatë periudhës, të paktën prej Tetorit 2018, kur ka vdekur i pari prej komisionerëve të “arrestuar” e në vijim, prokuroria rezulton se nuk ka kërkuar asnjë lloj informacioni rutinor nga Policia, përfshirë të dhënat e përgjithshme mbi personalitetin e të hetuarve, kontaktet e tyre, rrethin shoqëror, e për të kaluar më tej tek veprime të posaçme proceduriale si vëzhgime apo përgjime.
Duket qartë se, nëse prokuroria do të kishte kryer këto veprime normale proceduriale, me shumë mundësi do të kishte mësuar se dy prej personave nën hetim nuk jetonin më.
Por, siç duket, SPAK ka përdorur vetëm prova dokumentare, të siguruara prej shumë kohësh, për të urdhëruar arrestimin e 22 komisionerëve të zgjedhjeve të vitit 2017.
Skenari i dytë – Ka nga ata që besojnë se SPAK ka evidentuar përgjegjësinë penale të komisionerëve disa kohë më parë, por nuk është vlerësuar që ndaj tyre të veprohet me masë arresti.
Ky skenar mund të përligj faktin që SPAK nuk kishte informacion se dy komisionerë nuk jetonin më. Në praktikën e Prokurorisë Shqiptare ka pasur shumë raste të tilla, kur, në momentin që çështja ka shkuar në gjyq, të pandehurit e hetuar në gjendje të lirë, nuk jetonin më.
Ky skenar i dytë, të dërgon vetëvetiu në një skenar të tretë, i mbushur me impulse politike.
Skenari i tretë – SPAK vendosi të arrestonte persona të nivelit të poshtëm të hetimit me një “nxitje politike” dhe kjo justifikon edhe shpërndarjen thuajse të barabartë të komisionerëve nga çdo flamur partiak.
Nuk është hera e parë që prokuroria godet në mënyrë “politikisht të balancuar”. Me shumë mundësi, kjo është mënyra për të amortizuar goditjet që mund t’i vijnë institucionit të akuzës si “e përdorur politikisht”.
Kjo goditje “e balancuar politikisht” përkoi, ndoshta rastësisht, me debatet e nxehta politike mbi listat e hapura për deputetë dhe depolitizimin e komisioneve zgjedhore.
Veprimi më i fundit i SPAK me dosjen “339” u kap në ajër nga kryeministri Edi Rama, i cili me shumë mundësi ishte i parapërgatitur, për të dhënë mesazhet që të gjithë partitë janë përfshirë “në llumin” e manipulimit të zgjedhjeve e ndaj duhet depolitizim i komisioneve zgjedhore.
Rama e shfrytëzoi arrestimin e komisionerëve për të treguar se Ai nuk i ka vjedhur zgjedhjet e vitit 2017, duke tentuar të sfumojë në këtë mënyrë audio-përgjimet dhe shumë prova të tjera zyrtare, të cilat lidhin eksponentë të lartë socialistë me personazhe të botës së krimit, për të manipuluar zgjedhjet.
Gjithësesi, dy komisionerët “e arrestuar” sot nuk jetojnë.
Por, për fatin e tij të mirë, ish-kryetari i Bashkisë së Durrësit, Vangjush Dako, i konsideruar si personazh kyç në manipulimin e zgjedhjeve të vitit 2017, është në jetë dhe gëzon shëndet të plotë.
