Kryeministri Rama konfirmoi sot në Kuvend se në seancën e 30 korrikut do të votohet marrëveshja e arritur mes Partisë Socialiste dhe “opozitës” në parlament, lidhur me ndryshimet Kushtetuese, përsa i takon hapjes së listave dhe koalicioneve parazgjedhore.
“Më 30 korrik do të votojmë ndryshimet për të cilat kemi rënë dakord. Duan apo s’duan ata që nga jashtë parlamentit kujtojnë se sa më shumë të bërtasin, do të fitojnë.
30 korriku nuk cënon 5 qershorin. Ajo nuk bllokon ndryshimet që duhen adresuar. Ato nuk preken dhe do të zbatohen siç kemi rënë dakord. Sigurisht që pas votimit të gjithë janë në të drejtën e tyre që të vazhdojnë të diskutojnë”, tha Rama në Parlament.
Sipas tij, “PD dhe aleatët e saj, të mos lodhen duke kundërshtuar 30 korrikun, pasi ajo është një marrëveshje e nënshkruar, është vullneti i këtij Parlamenti që mund të jetë ilegjitim për Ilir Metën sipas rastit”.
“Kemi qenë dhe mbetemi gjithmonë për dialog. Nuk kam refuzuar unë ndonjëherë të ulem me Lulzim Bashën, ka refuzuar Basha të ulet me mua. Peng PS, shumicën dhe qeverinë nuk e merr dot askush.
Marrëveshja e 5 qershorit nuk është bllokimi i neneve që duhet të reflektojnë ndryshimet Kushtetuese. Ajo marrëveshje flet për administratën zgjedhore, financimin e partive. Ato nuk preken. Pas votimit të gjithë janë në të drejtën e tyre për të diskutuar.
Se kur votohet 5 qershorit nuk janë 82, por më shumë dhe kur votohet 30 korriku, janë 82… Kështu që, ne udhëheqim dhe natyrisht kjo na sjell në situata konflikti që nuk janë zgjedhja jonë.
Ne jemi për dialog dhe komunikim me të gjithë. S’kam refuzuar të ulem me Lulzim Bashën, ka refuzuar Lulzim Basha të ulet me mua. S’ka refuzuar PS të ulet me PD-në, por ka refuzuar PD-ja të ulet me PS-në. Për koalicionet ka kohë për të diskutuar”, deklaroi Rama nga foltorja e Kuvendit.
Sipas tij marrëveshja e 5 qershorit, nuk do të preket dhe këmbënguli që pas ndryshimit të Kushtetutës mund të diskutohen çështjet zgjedhore siç janë listat e hapura dhe koalicionet parazgjedhore.
Rama tha se Parlamentin dhe PS nuk mund t’a marrë peng askush, as në gjuhën shqiptare dhe në as ndonjë gjuhë tjetër të Botës.
