Aktualiteti politik solli sot një takim të presidentit Ilir Meta me ambasadorë të vendeve të Bashkimit Europian dhe atë të Britanisë së Madhe.
Kreu i shtetit priti në Presidencë diplomatët, por këtij takimi i pati paraprirë dhe një bisedë e pak ditëve më parë që Meta zhvilloi me ambasadoren amerikane Yuri Kim.
Ndryshe nga ai takim, ku pritej të miratohej në Kuvend marrëveshja e 5 qershorit, tani palët kalojnë në një tjetër moment, atë të miratimit të marrëveshjes PS-opozitë parlamentare për ndryshimet kushtetuese që sjellin lista pjesërisht të hapura, heqje te koalicioneve dhe një prag të ri elektoral.
Ky moment ka sjellë përplasjen mes PS dhe opozitës jashtë parlamentit. Vetë faktori ndërkombëtar përshëndeti marrëveshjen e 5 qershorit, ndërsa apelon konsensus për të gjitha reformat. Presidenti Meta u përfshi në debatin e krijuar për ndryshimet kushtetuese, ku mbështeti propozimin e opozitës jashtëparlamentare që çdo diskutim duhet të kalojë përmes Këshillit Politik.
Meta pas takimit: Kundër ndryshimeve kushtetuese të njëanshme
Meta reagoi pas takimit me ambasadorët duke u shprehur kundër ndryshimeve kushtetuese të njëanshme.
“Kënaqësi të prisja sot Ambasadorët e Delegacionit të BE, të vendeve anëtare dhe të Mbretërisë së Bashkuar të aktedituar në Tiranë. I sigurova se do të dekretoj menjëherë ndryshimet e Kodit Zgjedhor në respekt të Marrëveshjes konsensuale të 5 qershorit. Theksova rëndësinë e vazhdimit të punës së Këshillit Politik vetëm në frymën e konsensusit dhe gjithëpërfshirjes. I njoha me pozicionin tim të qartë se çdo prekje e njëanshme e Kushtetutës do të konsiderohet si akt i papranueshëm që synon të asgjesojë shtetin e së drejtës, demokracinë dhe të ardhmen europiane të Shqipërisë”, u shpreh kreu i shtetit, në një reagim në rrjetet sociale.
