Presidenti Ilir Meta ka zhvilluar një takim me kreun e PD-së Lulzim Basha në ambientet e Presidencës. Në një reagim pas takimit, Meta shprehet se do të dekretojë ndryshimet në Kodin Zgjedhor që u arritën me marrëveshje në tryezën e Këshillit Politik më 5 Qershor.
“Sapo përfundova një takim me kërkesën time me Kryetarin e Partisë Demokratike dhe liderin e Opozitës së Bashkuar z.Lulzim Basha. E sigurova se do të dekretoj menjëherë ndryshimet e Kodit Zgjedhor në respekt të Marrëveshjes konsensuale të 5 qershorit. E falenderova për kontributin konstruktiv në arritjen e Marrëveshjes së 5 qershorit dhe i kërkova të vazhdojnë punën në Këshillin Politik në frymën e konsensusit duke mos rënë pre e asnjë provokimi”, shkruan Meta në një postim në FB.
“Inkurajova vijimin e bashkëpunimit të ngushtë me të gjithë partnerët e investuar për çeljen sa më parë të negociatave të anëtarësimit të Shqipërisë me Bashkimin Europian dhe që kanë mbështetur Këshillin Politik në frymën e konsensusit dhe gjithëpërfshirjes”, shton kreu i shtetit.
Më herët gjatë ditës, Meta zhvilloi një takim me ambasadorë të vendeve të Bashkimit Europian dhe atë të Britanisë së Madhe.
Meta me ambasadorët e vendeve të BE: Kundër ndryshimeve kushtetuese të njëanshme
