Nga Klodian Tomorri
Sikur 6 milionë eurot që merr Check UP-i cdo vit, të ishin përdorur për testimin e popullatës, ndoshta shumë nga shqiptarët që kanë humbur jetën nga virusi, do të ishin gjallë.
Sikur rrjeti i laboratorëve të Check Up-it, të ishte përdorur për testimin dhe gjurmimin agresiv të virusit, ndoshta Shqipëria mund ta kishte përmbajtur epideminë dhe pronarja e koncesionit nuk do të detyrohej të shkruante letra nga shtrati i spitalit.
Por Check Upi nuk u vu në funksion të pandemisë, sepse po të vihej mund te cënoheshin fitimet e koncesionit. Në vend të kësaj, koncesioni u pezullua me marifet duke u zgjatur automatikisht me të njejtën periudhë. Kështu fitimet e Check Up-it u garantuan të paprekura për të gjithë jetëgjatësinë e kontratës. Dhe bëhet fjalë për fitime të ngjashme me atë të tregut të kokainës. Mjaftojnë vetëm disa shifra për ta ilustruar.
Check Up-i mund të jetë ndër rastet e rralla në botë, kur në vetëm dy vjet aksionerët pesëfishojnë kapitalin e tyre përmes fitimeve. Për ta thënë më qartë, zonja Nushi dhe partnerëe saj kanë investuar vetëm 30 milionë lekë kapital tek koncesioni i Check Upit. Por brenda dy viteve, për shkak të fitimeve te gjeneruara kapitali i tyre u pesëfishua në 150 milionë lekë.
Së dyti, kontrata e Check Up-it mund të jetë ndër investimet e vetme në botë, që shkyen veten dyfish që në vitin e parë. I gjithë investimi i koncesionarit për të ngritur rrjetin e laboratorëve është vetëm 3 milionë euro. Qënë vitin e parë buxheti i shtetit, i pagoi kompanisë 6 milionë euro. Pra dy herë më shumë se i gjithë investimi, për të gjithë jetëgjatësinë e kontratës së koncesionit.
Në botën e biznesit, një investim quhet i mirë kur e shlyen veten për 7-10 vjet. Koncesioni i kontrollit bazë ka arkëtuar që në vitin e parë 200 për qind të vlerës së investimit.
E nderuar zonja Nushi. Ti u shërofsh sa më shpejt dhe e pac jetën e gjatë. Por këto me sipër janë faktet. Letrat pastaj janë hartime.
Kështu që, herën tjetër para se t’i drejtoheni publikut me moral, ndoshta do ishte mirë të pyesnit një herë veten:
Kush po i vret shqiptarët sot: Mallkimet e rrjetit apo tahmaja për të mbajtur të paprekura milionat e koncesioneve?
Cila është arsyeja se pse Shqipëria sot teston më pak se të gjitha vendet e Europës për virusin: Mallkimet e rrjetit apo marifetet për të mbajtur të paprekura fitimet e koncesioneve, përfshire dhe vecanërisht fitimet e koncesionit tënd?
