Lëvizja për Universitetin përmes një deklarate i konsideron si ilegjitime zgjedhjet e 30 qershorit për Dekanët dhe Rektorët, ndërsa i bën thirrje studentëve si përbuzin ato.
Përmes një deklarate, Lëvizja për Universitetin thekson se prej miratimit të ligjit të arsimit të lartë, zgjedhjet për postet drejtuese në universitetet publike kanë qenë jolegjitime dhe të padenja për figurën e universitarit.
Në deklaratë theksohet se duke e reduktuar votën studentore në 10% dhe intensifikuar procesin e komercializimit dhe burokratizimit të jetës universitare, Qeveria ka bërë ç’është e mundur që përmes zgjedhjeve të mos ndryshohet asgjë. Janë gjithnjë të njëjtët njerëz, të njëjtat klane dhe e njëjta verbëri ndaj fateve të universitarizmit dhe studentëve në veçanti.
“Zgjedhjet e këtij 30 korriku janë edhe të turpshme. Si të mos mjaftonte diskriminimi ligjor, Ministria e Arsimit, Sportit dhe Rinisë vendosi që zgjedhjet të mbahen ditën kur asnjë student nuk do të jetë në auditorë. Në vend të ballafaqimit me problemet dhe pikëpamjet studentore, kandidatët për postet drejtuese, shpesh herë pa rivalë, po zhvillojnë një fushatë farsë duke përforcuar marrëdhëniet klienteliste brenda universiteteve.
Edhe më të turpshme e bën këtë proces kandidimi i disa pseudostudentëve për 10% e vendeve në senatet akademike. Kë do të përfaqësojnë këta kur me hir a me pahir pothuajse të gjithë studentët do t’i bojkotojnë zgjedhjet?! Bëhet fjalë për të njëjtat fytyra servilësh të forumeve rinore partiake, që gjatë protestave të dhjetorit 2018 tentuan të përçanin studentët dhe në përditshmëri luajnë rolin e sekserëve të partive dhe burokratëve të korruptuar universitarë.
Për të gjitha këto arsye, zgjedhjet e 30 korrikut duhen përbuzur dhe konsideruar pa kurrfarë legjitimiteti. Ato nuk janë përgjigje për problemet dhe aspiratat studentore, por një farsë procedurale që synon tjetërsimin përfundimtar të universitetit.
Pa rrëzimin e ligjit të arsimit të lartë dhe rritjen në 50% të votës studentore, universitetet do të vazhdojnë udhës së degradimit”, thuhet në deklaratë.
