Kryeministri Edi Rama siguroi se nesër në Kuvend do të votohet dhe do të miratohet marrëveshja e 5 qershorit dhe do të hyjë në fuqi.
”Ajo që kemi diskutuar me ekspertët në atë pjesë të shkurtër në mbledhje ka qenë adresimi i çështjeve, që u ngritën dje.
Në një prej tyre ishte dhe kjo çështje. Këtu ekspertët kanë dhënë një përgjigje shteruese. Që asgjë nuk preket në përmbajtjen e marrëveshjes së 5 qershorit, asgjë. Reflektimi në ligjin zgjedhor i risive kushtetuese është diçka tjetër.
Dhe nëse reflektimi do të kërkojë që të plotësohet një nen kur ndërkohë ka një nen të marrëveshjes, kjo s’ka të bëjë fare, është absurditet.
Marrëveshja e 5 qershorit votohet nesër. PD s’ka çfarë pret nga Këshilli lidhur me çështjet që ka ngritur.”- tha Rama.
Rama e ka quajtur absurde mungesën e PD-LSI në Këshillin Politik, për ndryshimet kushtetuese sa i përket ligjit zgjedhor.
“Do na duhet të reflektojmë në ligjin zgjedhor, lidhur me listat e hapura. Më duket absurde që të bojkotohet diskutimi për listat e hapura.
Nuk jemi në kushtet kur vendi s’ka institucione. Parlamenti nuk është inekzistent. Tani kemi konsenus me forcat parlamentare, prandaj opozita jashtëparlamentare duhet të merrte pjesë për diskutimet”, – tha Rama.
