Ish-drejtoresha e Tatimeve Vlorë është rikthyer në detyrë nga kryeministri Edi Rama. Pranvera Resulaj ishte shkarkuar në vitin 2018, për shkelje në detyrë në 2017, kur u akuzua për pjesmarrje në fushatën elektorale në kundërshtim me ligjin.
Mësohet se Rama në takimin e një dite më parë në Vlorë ka urdhëruar rikthimin e Pranverat Resulaj në Tatimet e Vlorës. Raportohet se Rama ka dhënë urdhër edhe për ndryshime të tjera në role drejtuese të drejtorive të Vlorës, raporton Faxnews.
Resulaj është promovuar nga kryeministri Rama kohë më parë duke e cilësuar atë si drejtoreshë të suksesshme ndërsa vet Drejtoresha e Përgjithshme e Tatimeve në 2018-ën doli publikisht dhe deklaroi se Resulaj ishte kapur me shkelje (pa specifikuar cfarë).
Resulaj është akuzuar edhe më herët në vitin 2017 për pjesmarrje në fushata elektorale në kundërshtim me ligjin, ndërsa ishte në pozicionin e drejtoreshës së Tatimeve në Vlorë. Asokohe Ministria e Financave kërkoi hetim për Resulajn.
Gjithashtu pas takimit të kryeministrit në Vlorë, do të ketë zëvendësime në disa pozicione. Pak ditë më parë Rama shprehur haptazi pakënaqësinë e tij me drejtimin e bashkisë nga Dritan Leli, dhe duket se tashmë e tutje emrat do të vendosen prej tij.
Vlora ka qenë vazhdimisht një nga bastionet e socialistëve, dhe me hijen e zgjedhjeve që do të mbahen maksimumi verën e vitit të ardhshëm, Rama duket se nuk do të humbasë qarkun që e ka nxjerrë dhe atë vetë deputet.
