Kategoria Superiore rikthehet pasditen e sotme me dy ndeshje të javës së 34-t. Duke filluar nga ora 17:45, Tirana pret në “Selman Stërmasi” Flamurtarin e rënë matematikisht nga kategoria me entuziazmin e kualifikimit në finale të Kupë së Shqipërisë. 24-herë kampionët e Shqipërisë janë shumë pranë një triumfi historik, pra mund të bëjnë “bis” në sezonin e 10-vjetorit.
Nuk pritet ndonjë rezistencë e madhe nga kuqezinjtë vlonjatë, megjithatë trajneri Emanuel Egbo ka bërë thirrje për të mos e nënvlerësuar kundërshtarin.
Tirana mund të shpallet që këtë matematikisht kampione nëse Kukësi nuk merr pikë në Shkodër, përballë Vllaznisë. Nëse verilindorët triumfojnë në “Loro Boriçi”, bardhebluve u duhet të paktën edhe një fitore (por jo dy barazime) në dy ndeshjet e fundit me Laçin në transfertë dhe Bylisin në Tiranë.
Nga ana tjetër po në të njëjtën orë në Gjirokastër luhet sfida mes Luftëtarit dhe Skënderbeut. Një takim që ka një favorit absolut që është ekipi korçar. Sidoqoftë, triumfi i ekipit të Ilir Dajës do të ketë vlerë nëse në fund të sezonit Skënderbeu renditet në zonën europiane dhe vendimi i Gjykatës Federale në Zvicër do të jetë pozitiv.
