Shqipëria po vijon të mbetet vendi i çudirave. Në kulmin e pandemisë ndaj koronavirusit, u bëmë i vetmi vend që nxorri në rrugë ushtrinë, blindat dhe policinë, ndërkohë që në çdo vend tjetër, që sot rezulton i suksesshëm ndaj koronavirusit u shtuan testimet, gjurmimi i rasteve dhe trajtimi mjekësor.
Edhe sot kur megjithëse ka një shtim të rasteve me Covid-19, ku duket se ka një shtim të testimeve krahasuar me fillimin dhe kulmin e pandemisë, por jo të mjaftueshme për të izoluar përhapjen, sërisht si zgjidhje jepet policia.
Duket se ekipit të epidemiologëve të ISHP i është bashkuar edhe Sandër Lleshaj, ministri i Brendshëm, që sot zgjodhi të shkonte në Durrës, për të dhënë disa mesazhe.
“Na duhet të ndërpresim me çdo kusht zinxhirët e përhapjes së virusit”, tha Lleshaj, ndaj paralajmëroi masa të rrepta dhe ndëshkim për të gjithë ata “që me papërgjegjshmërinë e tyre rrezikojnë të infektojnë të tjerët”.
Sipas tij, policia ka marrë masa për të goditur çdo rast që rrezikon jetën e qytetarëve sa i takon koronavirusit.
Lleshaj kërkoi nga operatorët të garantojnë për pushuesit sigurinë.
“Kërkohet thellim i masave për sigurinë, operatorët që shërbejnë në ujë e rërë marrin para nga qytetarët jo për ujin e rërën, por shërbimin e parë, siguria, jo shezlongu.
Duhet të ketë rojet e plazhit mjetet e shpëtimit, asetet për të siguriar ndihmë ndaj qytetarëve e parandaluar cënimin e jetës së qytetarëve”, tha ai.
Nuk dihet nëse nga inspektimet sot në plazhin e Durrësit, Lleshaj dhe shefat e policisë që e shoqëronin, arritën të gjenin koronavirusin, që prej muajsh e cilësojnë një armik të padukshëm, jo në aspektin shëndetësor, por që mendojnë se trembet nga trupat policore ose blindat.
