Albi Doka po zhvillon një sezon mjaft pozitiv me skuadrën e Tiranës. Gjatë gjithë sezonit, 23-vjeçari ka shkëlqyer, duke treguar se ka bërë hapin e madh dhe është pjekur për një aventurë jashtë Shqipërisë.
Në një intervistë për “Panorama Sport”, Albi Doka rrëfen sezonin e tij, Tiranën dhe çfarë lë pas te bardheblutë, duke nisur një aventurë të re jashtë Shqipërisë.
Ky do të jetë sezoni i fundit për të me fanellën bardheblu, pasi ka firmosur kontratë me klubin kroat të Goricës.
Sezoni i fundit si profesionist te Tirana- Është viti që e dua më shumë. Po fitojmë kampionatin dhe Kupën. Këtë dua, është maksimumi. Shyqyr, po kalojmë një formë të mirë. Gjëja më e bukur që dua para se të iki është të fitoj kampionatin dhe Kupën.
Arsyet e largimit nga Tirana- Vendimin e mora për karrierën time dhe për t’u rritur. Kam pasur shumë dëshirë të firmos me Tiranën, por kisha ofertë nga jashtë. Dëshira ime ishte të vazhdoja karrierën jashtë, se është më mirë për mua personalisht. Kjo stemë do të më mungojë, ngjyrat bardheblu, se jam rritur dhe do të jetë gjithmonë në zemrën time.
