Në 16 ditët e para të korrikut në Shqipëri janë regjistruar 42 humbje jete si pasojë e COVID-19. Referuar shifrave zyrtare shkalla e vdekshmërisë në vendin tonë është 2.7 për qind.
Një ditë më parë u raportuan 3 pacientë që kanë humbur jetën, ndërkohë që në total numri i personave që nuk kanë fituar betejën me Covid-19 ka shkuar në 104.
Referuar shifrave ka pasur një rritje me disa herë të numrit të personave të infektuar, krahasuar kjo me periudhën që konsiderohej si piku i pandemisë, ndërsa një prej anëtarëve të Komitetit Teknik, drejtori i Urgjencës Kombëtare, Skënder Brataj, ka paralajmëruar se në muajin gusht do të ketë një shtim të rasteve. Sipas tij, kjo ka lidhje me mosrespektimin e masave, por edhe vënien në funksion të transportit publik.
Në vendin tonë, aktualisht janë 1610 persona aktivë me COVID-19, kryesisht në Tiranë, Shkodër, Krujë, Durrës. Ministria e Shëndetësisë ka folur për një përhapje komunitare të virusit në disa bashki, që mendohet se janë edhe ato që sot numërojnë numrin më të lartë të rasteve ditore, por edhe pacientëve aktivë me Covid-19.
Për shkak të shtimit të rasteve me Covid-19, Ministria e Shëndetësisë ka vendosur që mbajtja e maskave në ambientet e mbyllura të jetë e detyrueshme.
Maskat janë të detyrueshme për tu mbajtur në: administratën publike dhe jopublike; në transportin publik; në zyra, shkallë pallati, ashensorë, në qendrat tregtare, dyqane, supermarketet, tregjet dhe njësitë e shërbimit.
