Presidenti Ilir Meta dhe kreu demokrat Lulzim Basha kanë zhvilluar një takim sot në Presidencë me kërkesë të Kreut të Shtetit, ndërsa Kuvendi po vijon diskutimet mbi ndryshimet Kushtetuese lidhur me listat e hapura dhe ndalimin e koalicioneve parazgjedhore. Në takim gjithashtu raportohet se ka qenë i pranishëm edhe Sekretari i Përgjithshëm i PD-së, Gazmend Bardhi.
Burime nga takimi bëjnë me dije se Kreu i Shtetit i ka kërkuar Bashës që opozita të ruajë qetësinë, ndërsa e ka cilësuar si kriminale tentativën e mazhorancës për të ndryshuar Kushtetutën në mënyrë të njëanshme.
Mësohet se Meta u shpreh se shqiptarët duhet ti bashkojë Kushtetuta dhe rruga europiane e Shqipërisë.
“Keni rol të rëndësishëm me qetësi dhe përgjegjshmërinë tuaj për të bashkëpunuar edhe me partneret Europian dhe botën demokratike se e kam theksuar se gjatë tensioneve artificiale në vendin tonë se konfliktet në Shqipëri nuk janë të rastësishme sa herë ka zhvillime apo ka zhvillime në rajon. Jini të vetëpërmbajtur”, ka deklaruar Meta.
Ai ka vijuar duke theksuar se e rëndësishme të mos bëjmë aventura me Kushtetutën.
“Sot janë zgjedhjet në Maqedoninë e Veriut dhe është një gjë pozitive jo vetëm për ata, por është një moment reflektimi për të gjithë ne këtu që të japim mesazhe pjekurie dhe përgjegjshmërie.
Dua të falënderoj bashkëpunimit tuaj gjatë periudhës së pandemisë dhe pjesëmarrjen konstruktive në mbledhjen e Këshillit të Sigurisë Kombëtare dhe mos rënien pre për largimin nga tryeza politike pas shembjes së teatrit.
Do kërkoja nga ju që ti qëndronim besnikë marrëveshjes së firmosur me përfaqësuesit e mazhorancës dhe të ruani qetësinë dhe në këto momente kur ka përpjekje për të cenuar rëndë kushtetutën e vendit në mënyrë kriminale dhe për të shkatërruar çdo lloj legjitimiteti të institucioneve që ekzistojnë në vend.
Kur nuk është parë të mohohet kaq shpejt një marrëveshje pa u tharë boja”, mësohet të jetë shprehur Meta.
Ndërkohë që kreu demokrat e ka cilësuar tentativën për ndryshimin e Kushtetutës si një veprim që minon marrëveshjen e 5 qershorit, e cila sipas Bashës çtensionoi situatën politike në vend.
“Qeveria po thyen marrëveshjen e 5 qershorit”, mësohet të jetë shprehur Basha.
Takimi vjen në një kohë kur nga mazhoranca e drejtuar nga Edi Rama dhe ajo që quhet si “opozita” e re, po ecet përpara me një projekt që bie ndesh me marrëveshjen e 5 qershorit, të arritur në Këshillin Politik, me ndërmjetësimin e SHBA dhe BE.
Presioni ndërkombëtar lidhur me tentativën e ndryshimeve Kushtetuese po bie mbi Kryeministrin Rama.
