Luhet Juventus-Atalanta, bardhezinjtë kërkojnë të “vrasin” kampionatin, miqtë synojnë vendin e dytë

Mbrëmjen e sotme, Juventusi pret në Torino Atalantën, ndeshje kjo e vlefshme për javën e 32-të të Serie A.

Bardhezinjtë kanë një sfidë ku do të testohen maksimalisht pasi përballë kanë një skuadër mjaft të fortë që po zhvillon një sezon fantastik në Europë dhe në Itali. Skuadra bergamaske befas numëron plot 6 fitore radhazi në kampionatin italian dhe me një ecuri të tillë klubi lombard vazhdon të ngjisë një e nga një shkallët në klasifikimin e përgjithshëm të Serisë A.

Juventusi kryeson tabelën e renditjes në kuotën e 75 pikëve, 7-të më shumë se Lazio që pozicionohet e dyta dhe 9-të pikë më shumë se Atalanta që është forca e tretë e kampionatit.

Miqtë do të duhet të ruhen nga Cristiano Ronaldo që ka shënuar në të pesta ndeshjet që pas rikthimit, duke u ngjitur kështu në kuotën e 26 golave, ndërsa në krahun tjetër spikat treshja më e mirë e kampionatit Muriel–Ilicic-Zapata me 46 gola gjithsej.

LEXO EDHE  ‘Djeg’ konkurrencën e PSG dhe Milanit, Interi merr Tonalin

Takimi do të luhet në orën 21:45 në Torino, ku dy skuadrat barazuan 1-1 në përballjen e edicionit të kaluar, sakaq në fazën e parë fituesit e 8 kampionateve të fundit në Serinë A ia dolën për të përmbysur disavantazhin për të fituar 3-1, me 3 gola të shënuar në çerek orën e fundit të takimit, por sidoqoftë kjo është fitorja e vetme e bardhezinjve në katër sfidat e fundit ndërmjet dy klubeve.