Deputetja Rudina Hajdari u shfaq sot publikisht me një qëndrim si ai i Kryeministrit Edi Rama për heqjen e koalicioneve zgjedhore dhe listat e hapura.
Hajdari solli në vëmendje dy deklarata të kreut demokrat Lulzim Basha, që i përkasin vitit 2017, kur ai deklaronte se duheshin lista të hapura, dhe një tjetër ku premtonte se nuk do të bëjë koalicion me LSI.
“Në zgjedhjet e 2017 ai i hoqi këto koalicione. Dua të di pse ndryshohen këto mendime. Dua të jemi politikanë me koherencë.
Unë i them çdo demokrati që nuk do të qeverisim me LSI. I them çdo demokrati mos bëni gabim se ndryshe do dalim si baftjar. Kush është Baftjari sot sipas jush.
Këto janë premtimet e Bashës që janë bërë në 2017. Sot Basha qahet se i kanë hequr koalicionet. Ai nuk po e mban sot këtë premtim. Unë nuk dua të punoj për familjet e tyre por të garoj me një alternativë tjetër. Nuk do lejoj që pluralizmi të vdesë”, tha Hajdari.
Deputetja Hajdari i ka mëshuar hapjes së listave që në fillim të procesit të Reformës Zgjedhore, si një pikë e pa lidhur ngushtësisht me heqjen e koalicioneve parazgjedhore.
“Në zgjedhjet e ardhshme unë do të garoj, por nuk dua të punoj për familjen Rama, Basha apo Meta”, tha Hajdari, e cila nuk dha sqarime nëse do të garonte me një formacion të ri politik, apo jo.
