Kryeministri Edi Rama ka reaguar pas deklaratës së kreut demokrat, Lulzim Basha, se kohët e fundit Kreu i Qeverisë i ka bërë ofertë që të heqin koalicionet dhe ‘ai të bëhet President e Basha Kryeministër’.
Përmes një shënimi në Twitter, Rama thotë se nuk është populli që të vendosë do të bëhet apo jo Basha Kryeministër, ndërsa për koalicionet ka thënë “se as e ndalon hapja e listave që ta bëjë, as e detyroj dot unë që ta zhbëjë”.
“Lul merre me qetësi këtë proces ku more gjithë çfarë deshe, e lëri sharjet e kërcënimet, sepse koha e ka treguar që të çojnë vetëm nga humbja në humbje!”, shkruan Rama.
Reagimi i plotë:
Listat e hapura do fuskan kriminelët në parlament sipas LB e unë dashkam të bëhem President me LB kryeministër,se paskam frikë nga humbja.
Në fakt jo, unë e di popullin më të mençur se veten prandaj dua të hapen listat,e s’e bëj dot Lulin KM se s’jam Populli që e vendos këtë!
Sa për koalicionin me SHPK e LSI siç e quan LB,as e ndalon hapja e listave që ta bëjë, as e detyroj dot unë që ta zhbëjë! Prandaj Lul merre me qetësi këtë proces ku more gjithë çfarë deshe,e lëri sharjet e kërcënimet,sepse koha e ka treguar që të çojnë vetëm nga humbja në humbje!
