Policia spanjolle arrestoi 22 persona, të moshave nga 34 në 55 vjeç, me kombësi shqiptare, spanjolle dhe rumune, në kuadrin e një operacioni të gjerë kundër trafikut të drogës dhe pastrimit të parave. Operacioni i koduar “Ilirico-Villajuana” u shtri në Valencia.
Policia ka zbuluar 6 plantacione me kanabis me rreth 2.600 bimë marihuanë, 150,000 euro dhe bizhuteri me vlerë 30,000 euro.
Pas hetimeve të para të disa personave në Valencia, u zbulua se ata ishin të lidhur trafikun ndërkombëtar të drogës, dhe në këtë mënyrë policia ra në gjurmën e një organizate kriminale, e cila drejtohej nga shqiptarë.
Në operacion u përfshi edhe DEA amerikane si dhe Drejtoria Qendrore e Antidrogës së Italisë, pasi disa prej të arrestuarve kishin jetuar në këto vende.
Si rezultat i hetimeve, u zbulua se grupi kriminal kishte një organizim të përkyer dhe hierarkik, ku anëtarët kishin misione të qarta.
Policia zbuloi njerëzit që kujdeseshin për bimët, ata që e transportonin në vendin e depozitimit si dhe transferimin e kanabisit përmes kompanive të vendosura në Spanjë, të cilat përdoreshin si mbulesë e veprimtarisë së paligjshme.
Policia zhvilloi njëkohësisht kontrolle në 17 shtëpi në pjesë të ndryshme të krahinës së Valencisë (València, Torrent, Ontinyent, Ribarroja dhe Xàtiva, ndër të tjera) dhe Rajoni i Murcia.
