Meksika po përballet me një kapitull të ri në luftën kundër krimit të organizuar pas vdekjes së Nemesio Oseguera Cervantes, i njohur si “El Mencho”, lider i kartelit Jalisco New Generation (CJNG).
Ai u vra gjatë një operacioni të forcave ushtarake në Tapalpa, në shtetin e Jalisco. I konsideruar si një nga trafikantët më të kërkuar të drogës në botë, Oseguera drejtoi për vite me radhë një nga organizatat kriminale më të fuqishme në Meksikë. Agjencia amerikane DEA kishte ofruar deri në 15 milionë dollarë shpërblim për informacione që do të çonin në arrestimin e tij.
Pas eliminimit të tij, autoritetet meksikane dhe amerikane kanë përditësuar listën e personave më të kërkuar, ku përfshihen figura kyçe të karteleve si CJNG dhe karteli Sinaloa.
Në fokus janë anëtarë të grupit “Los Chapitos”, fraksioni i kartelit Sinaloa që drejtohet nga djemtë e Joaquín Guzmán, i njohur si “El Chapo”. Mes tyre përmendet Iván Archivaldo Guzmán, për të cilin ofrohet një shpërblim deri në 10 milionë dollarë. Ai akuzohet për trafik droge dhe për nxitje të dhunës pas arrestimit të vëllait të tij, Ovidio Guzmán.
Gjithashtu në listë janë edhe figura të tjera të dyshuara për përfshirje në trafikimin e fentanilit, pastrim parash dhe organizim të rrjeteve ndërkombëtare kriminale.
Sipas autoriteteve amerikane, shumë nga objektivat aktualë lidhen me prodhimin dhe shpërndarjen e fentanilit, një opioid sintetik që ka shkaktuar mijëra viktima nga mbidoza në SHBA.
Emra si Liberio Nuñez-Aguirre, i njohur si “El Karateca”, konsiderohen hallka kyçe në rrjetet e trafikimit të drogës dhe transferimit të parave drejt Shteteve të Bashkuara. Për arrestimin e tij ofrohet një shpërblim prej 1 milion dollarësh.
Lista përfshin gjithashtu individë të lidhur me organizata kriminale ndërkombëtare, përfshirë rrjete nga Amerika Qendrore dhe Amerika Latine, të cilat bashkëpunojnë me kartelet meksikane.
Vdekja e “El Mencho” shihet si një goditje e rëndësishme për CJNG, por ekspertët paralajmërojnë se ajo nuk do të thotë fundi i aktivitetit të kartelit. Në Meksikë, shpesh eliminimi i një lideri pasohet nga riorganizime të brendshme dhe përplasje të dhunshme për pushtet.
Autoritetet meksikane dhe amerikane kanë theksuar se prioritet mbetet shkatërrimi i strukturave financiare dhe rrjeteve të trafikut, për të dobësuar ndikimin e karteleve në rajon dhe më gjerë.
