Kryeministri Edi Rama i ka të sigurta mbi 85 vota në Parlament për të miratuar reformën zgjedhore, sipas marrëveshjes së arritur në Këshillin Politik. Janë të paktën që 7 deputetë, nga ajo që konsiderohet opozita e re, që janë deklaruar pro votimit të draftit konsensual, i cili parashikohet të kalojë në seancën e 23 korrikut.
Rama ka në Kuvend 74 mandate të PS-së, por pa përfshirë këtu Tom Doshin nga PSD dhe Robert Bitrin, ish-deputetin e LSI, që iu bashkua PS. Po të përfshihen këtu edhe 3 deputetët e PDIU, që janë pothuajse pjesë e grupit parlamentar socialist, numri shkon në 79.
Ndërkohë nga opozita parlamentare kanë deklaruar votën pro Artur Roshi, Fatjona Dhimitri dhe Besnik Troplini. Të tre deputetët janë shprehur të gatshëm të votojnë pa ndryshime Marrëveshjen e 5 Qershorit në Këshillin Politik me ndërmjetësimin e SHBA dhe BE.
Gjithashtu pro marrëveshjes janë deklaruar edhe Lefter Maliqi, Gjetan Gjetani dhe Suzana Topi.
Pra numri i deputetëve shkon në 85, pa përfshirë këtu Lefter Kokën, deputetin e LSI-së, që nuk dorëzoi mandatin. Dhe nëse Koka voton pro, atëherë numri shkon në 86, ndërkohë që votat që duhen janë 84.
