Gjykata e Apelit të Tiranës ka konfirmuar ditën e sotme (7 korrik) masën e arrestit me burg për Sebastian Malin. Ky i fundit dyshohet se është bashkëpunëtor në ekzekutimin e Hekuran Billës në zonën e Komunës së Parisit. Billa u ekzekutua me armë zjarri teksa ishte nën drejtimin e një automjeti.
Lidhur me krimin janë arrestuar dhe tre persona të tjerë, të lënë në arrest me burg nga gjykata – Viktor Marku, Gjekson Pusi dhe Adjola Lakra.
Kjo e fundit, sipas hetimeve, ishte infiltruar nga Viktor Marku dhe Sebastian Mali për ta nxjerrë biznesmenin në pritë. Mali dyshohet se ishte personi që ruante lëvizjet e Billës, ndërsa Viktor Marku – ekzekutori. I arrestuari i fundit, Gjekson Pusi akuzohet se ka qenë drejtuesi i mjetit me të cilën lëvizi Viktor Marku kur ndodhi atentati.
Ekzekutimi i Hekuran Billës, sipas grupit hetimor, ka lidhje me një vrasje të ndodhur në vitin 2006 në Angli. Asokohe, Hekuran Billa vrau me armë zjarri Pal Markun, vëllanë e Viktor Markut.