Napoli ka triumfuar me rezultatin 2-1 ndaj Romës në “Sao Paolo”, në ndeshjen e vlefshme për javën e 30-të të Serie A.
Pjesa e parë u mbyll me rezultatin e bardhë 0-0, ndërsa në 45 minutat e dyta skuadrat u zhbllokuan duke shënuar tre herë. Fillimisht ishte Callejon, ai i cili kaloi napolitanët në avantazh në minutën e 55-të pas një asisti fantastik nga Rui.
Më pas, Roma, reagoi shpejt dhe barazoi rezultatin pesë minuta më vonë me Mkhitaryan. Mesfushori armen realizoi pas një goditje të fuqishme jashtë zone duke mundur portierin Meret.
Ndërkohë ai që vendosi fatet e sfidës ishte sulmuesi kryesor i Napolit, Lorenzo Insigne, që shënoi një “perlë” në minutën e 82-të.
Kjo ka qenë humbja e tretë radhazi në kampionat për verdhekuqtë, të cilët mund të ngushëllohen me kthimin në fushë të Zaniolo-s pas një mungese prej gjashtë muajsh për shkak dëmtimi.
