Kryeministri Edi Rama ka shfrytëzuar vizitën zyrtare të homologut nga Kosova, Avdullah Hoti, për të folur mbi mbledhjet e përbashkëta mes dy qeverive.
E ndërsa kishte disa muaj që kishte harruar njq tezë të tillë, sot Rama e ka rikthyer në vëmendje, madje duke u shprehur se mbledhja e ardhshme do të mbahet në Shkodër.
“Jemi dakorëdësuar për të përcaktuar një afat të ri për mbajtjen e mbledhjes së Shkodrës mes dy qeverive, me shpresën që situata jo e lehtë lidhur me COVID të na e mundësojë në gjysmën e dytë të shtatorit.
Jemi dakordësuar edhe për një tjetër event të rëndësishëm që do të zhvillohet për herë të parë mes nesh, me shpresë se situata do të na e mundësojë në nëntor, ku dy qeveritë të sponsorizojnë kongresin e parë të autoriteteve vendore, që dëshirojmë të kthehet në një kongres tradicional, ku kryetarët e bashkive dhe komunave, sikur quhen në Kosovë, të ndajnë praktikat e mira, sfidat e përbashkëta në adresimin e problemeve komunitare dhe potencialin e nismave të përbashkëta”, tha Rama.
Edhe më parë mes Shqipërisë dhe Kosovës janë zhvilluar mbledhje të përbashkëta, por duket se vendimet e marra kanë mbetur në letër dhe kjo është provuar nga denoncimet e shumta në të dy anët e kufirit që ndajnë dy vendet.
