Dyshimet për trukim të takimit Bylis – Tirana, FSHF kërkon informacion te Sport Radar

Federata Shqiptare e Futbollit ka reaguar lidhur me gjysmëfinalen e kupës Bylis – Tirana (2-1) dhe raportimeve se ndeshja mund të ketë qenë e trukuar.

FSHF njofton se menjëherë pas përfundimit të ndeshjes Bylis – Tirana (2-1), e vlefshme për gjysmëfinalet e Kupës së Shqipërisë, ka kërkuar informacion nga kompania “Sport Radar” nëpërmjet UEFA-s, për të mësuar nëse ka pasur baste të dyshimta për këtë takim.

“Federata bën me dije se, ka nisur hetimin për këtë çështje dhe po grumbullon materialet e nevojshme dhe do te ketë vendimarrje, në rast se do të ketë prova. Gjithashtu, FSHF prej kohësh e ka bërë të qartë qëndrimin e saj të prerë kundër këtij fenomeni tejet të dëmshëm për futbollin dhe paralajmëron edhe një herë klubet se do të përballen me masa të rrepta dhe sanksione ekstreme, deri në përjashtim nga aktiviteti, në rastet kur akuzat për trukim do të provohen”, thuhet në njoftimin e FSHF.

Koeficientët

Bylis-Tirana pati elemente të një ndeshjeje të dyshimtë. U vunë re lëvizje të çuditshme të koeficienteve të kompanive të basteve, por edhe të kompanive vendëse që operojnë në mënyrë ilegale, pasi dihet se bastet sportive janë të ndaluara në Shqipëri. Sipas kuotave fillestare, Tirana ishte favorite për ta fituar ndeshjen, me një koeficient 1.8, ndërsa suksesi i vendësve ishte me koeficient katër.

Por, duke parë rrjedhën e ngjarjeve, koeficientet lëvizën shumë, madje edhe pse Tirana e mbylli pjesën e parë në avantazh, para fillimit të pjesës së dytë shikohet një ulje e koeficientit të fitores së Bylisit, gjë e cila tregon se është goditur nga bastexhinjtë përmbysja e vendësve, gjë e cila ndodhi. Madje, kompanitë ilegale vendëse pas barazimit 1-1 e hoqën ndeshjen nga bastet “live” duke bllokuar koeficientet. Humbja e penalltisë nga Bylisi në fund të ndeshjes është një tjetër episod që shton dyshimet se ndeshja ka qenë e çuditshme. Për këtë takim ka pasur edhe një prognozë që nuk bëheshin më shumë se tre gola dhe këtu të lindin sërish dyshime për një penallti të shpërdoruar nga Goxha. Ajo që e bën më të mjegullt pasqyrën e kësaj ndeshjeje, janë deklaratat e dhëna nga presidenti i Tiranës, Refik ‘ Halili, pas ndeshjes, si dhe trajneri i Bylisit, Veljko Dovedan, i cili deklaroi se për të gjuajtur penalltinë kishte caktuar Ujkën, por u ekzekutua nga një tjetër lojtar.

LEXO EDHE  Sherr te Tirana, çfarë ndodhi mes Ngoo dhe Karabecit

Ndërkaq, “Procesi Sportiv” në pushim të ndeshjes publikoi një foto të koeficienteve të takimit, ku megjithëse Tirana ishte në avantazh, koeficientin për të fituar ndeshjen e kishte më të ulët Bylisi. E thënë ndryshe, bastexhinjtë vazhdonin të “godisnin” fitoren e Bylisit që gjendeshin në disavantazh 1- 0, kishte përballë ekipin më të fortë të kampionatit dhe kishte vetëm 45 minuta kohë në dispozicion.

Faksimile e një faqeje që mendohet se është kompani bastesh ilegale, publikuar nga “Procesi Sportiv” në fund të pjesës së parë, ku tregon se paçka se Tirana udhëhiqte 0-1 në Ballsh, kuotat parashikonin se Bylisi ishte favorit për të fituar krejt takimin.