La Liga/ Mbyllet Barcelona-Atletico, skuadrat ndajnë nga një pikë

Është mbyllur në barazim 2-2 super përballja midis Barcelonës dhe Atletico Madrid, e vlefshme për javën e 33-të në La Liga.

Fillimisht ishin katalanasit që kaluan në avantazh në minutën e 12-të të takimit, falë një autogoli të Diego Costas. Mirëpo vetëm 3 minuta më pas “Los Colchoneros” fituan një penallti  të cilën fillimisht e mori përsipër Costa.

Sulmuesi spanjoll nuk u tregua i saktë përballë portierit Ter Stegen, por arbitri vendosi ta anulojë, për shkak se portieri gjerman kishte kaluar vizën.

Në përpjekjen e dytë, penalltinë më pas e mori përsipër, Saul, i cili barazoi shifrat. Pjesa e parë u mbyll me këtë rezultat, ndërsa në të dytën u shënuan edhe dy gola të tjerë.

LEXO EDHE  Kategoria Superiore/ Mbyllet java e 33-të, ja rezultatet e ditës së sotme

Blaugranët ishin ata që kaluan sërish të parët avantazh. Në minutën 50-të Barça fitoi një penallti të cilën e mori përsipër si zakonisht Lionel Messi. Sulmuesi argjentinas u tregua i saktë përballë portierit kundërshtar, duke realizuar një gol me “Panenka”. Ky ishte dhe goli i 700-të në karrierë për Messin.

Por djemtë e Simeones nuk u dorëzuan dhe 12 minuta më vonë barazuan rezultatin me Saul, i cili shënoi golin e dytë personal edhe këtë herë me anë të një 11-metërshi.

Titulli për Barcelonën bëhet një mision tepër i vështirë, pasi në rast fitoreje të Realit ndaj Getafes, diferenca mes skuadrave do të shkonte në katër pikë.