Antimafia italiane ka sekuestruar 3.5 ton lëndë narkotike, në një operacion të përbashkët me autoritetet ligjzbatuese shqiptare, ndërsa janë arrestuar 37 persona mes Italisë e Shqipërisë.
Lënda narkotike vlerësohet në rreth 40 mln euro.
Operacioni i drejtuar nga Antimafia e Barit në bashkëpunim me repartet e Antimafias, të Policisë së Shtetit e të Guardia di Finanzës u shtri në qytetet Foggia, Lecce, Bologna, Roma, Napoli e Catanzaro.
Operacioni është kryer në bashkëpunim me Autoritetet Shqiptare, me CriminalPol, me zyrën ndërlidhëse të Interforze në Tiranë e me koordinimin e Eurojust, që çoi në arrestimin e 37 personave, si përgjegjës të një trafiku ndërkombëtar droge.
Gjatë hetimeve janë sekeustruar 3 ton e gjysmë drogë e tipit marijuanë, hashash e kokainë, e vlefshme për të përgatitur 7 milionë doza drogë me vlerë 40 milionë euro.
Në orët e para të mëngjesit të sotëm po realizohet edhe urdhri i sekuestrimit të pasurive të të arrestuare me vlerë deri në 4 milionë euro.
Në orën 12 të paradites së sotme do të mbahet një konferencë e përbashkët shtypi.
Në konferencë do të marrë pjesë Kreu i Antimafias e i Antiterrorizmit Italian Federico Calfiero De Raho, Prokurori Special i Antikorrupsionit e Krimit të Organizuar shqiptar Arben Kraja, Nënkryetari i Eurojust Filippo Spezia, prokurori i Barit Giuseppe Volpe, kreu i Antimafias së Barit Francesco Giannella, si edhe Drejtori i Antimafias Italiane Gjeneral Giuseppe Governale.
