Për Denar Bibën është hera e tretë që një marrëveshje për të shuar një konflikt politik, i kushton mandatin si anëtar i KQZ-së.
“Më është dashur disa herë të jap dorëheqjen në këtë institucion për tu rikthyer sërish. Thuajse është një cikël i përfunduar dhe praktikisht mandati im mbaronte në fund të këtij viti, kështu që disa muaj më pak në këtë pikë nuk ndryshojnë asgjë”, shprehet Biba.
Por a ndihet njeriu që ka përfaqësuar më gjatë socialistët në KQZ i tradhtuar nga Edi Rama?
“Në marrëdhëniet publike nuk funksionohet përmes këtyre besave kanunike legjendare. Nuk ka një diçka të tillë”, thotë ai.
Pakti i 5 qershorit, edhe për nënkryetarin në largim të KQZ-së, nuk është një reformë.
“Ishte një marrëveshje politike për t’i dhënë garanci opozitës që ajo të futet në zgjedhje.”, deklaron Biba.
Formula e re e KQZ-së, për Denar Bibën është një makiazh mbi skeletin e vjetër. “Për të prezantuar një format të ri të KQZ-së, i cili është akoma më politik nga ky i pretenduari që është sot. Besoj se do të funksionojë. Jemi ekzaktësisht atje ku kemi qenë, vecse nuk do të paguhen 7 individë por do të paguhen 12”, shprehet ai.
Pavarësisht se KQZ më herët ka dështuar të përdorë teknologjinë në zgjedhje, Biba thotë se, nëse nuk vonohet miratimi në Kuvend i Kodit të ri Zgjedhor, identifikimi biometrik mund të realizohet.
“Nëse Komisioni i ri Qendror i Zgjedhjeve do të formatohet sa më shpejt të jetë e mundur, unë besoj se ka kohë deri në pranverën e ardhshme për të realizuar identifkimin biometrik përmes shenjave të gishtave”, thekson ai.
Duke thirrur në ndihmë kontaktet e tij gjatë kohës së detyrës në KQZ, Biba thotë se shifra e artikuluar se identifikimi biometrik mund të kushtojë 15 milionë euro, është e tepërt dhe jo realiste.
“Përfaqësues të firmave të mëdha të teknologjisë botërore, të mirënjohura, tepër të sigurta, i ofrojnë këto pajisje në vlera relativisht modeste, diku nga 150 në maksimalisht 700 dollarë për pajisje. Duke menduar që duhet një pajisje për një qendër votimi, kemi 5600 qendra votimi, shkon diku tek 4 milionë dollarë apo 3 milionë e ca euro, kryhet dhe përballohet lehtësisht edhe nga shteti ynë”, thotë Biba.
Dhe që KQZ-ja e re të arrijë të sigurojë identifikimin biometrik për vitin tjetër, Biba shpreson që mes 12 anëtarëve të vijnë ish kolegë të tijët.
“Me sinqeritet uroj që të ketë sa më shumë kandidatë dhe të zgjedhur nga ish anëtarët e KQZ-së ndër vite. Sepse misionet përpara tyre janë të mëdha, koha në dispozicion relativisht e shkurtër, dhë nëse vijnë njerëz fare pa përvojë, kjo do e vështirësonte edhe më tepër realizimin e këtij misioni”, thekson ai.
Ditën që Kodi i ri Zgjedhor do të hyjë në fuqi, Denar Biba, bashkë me 4 kolegët e tij, përfundojnë detyrën në KQZ. /abcnews.al
