Studentët kërkuan anulimin e tarifave për vitin akademik/ Ministria e Arsimit: Ankesat ua kemi adresuar universiteteve

Ministria e Arsimit ‘ia kalon topin’ Universiteteve lidhur për kërkesën e studentëve për anulimin e tarifave për vitin akademik 2019-2020”.

Ministrja e Arsimit, në një reagim lidhur me letrën që një grup studentësh depozituan më 17 qershor “Mbi anulimin e tarifave për vitin akademik 2019-2020”, ditë kur zhvilluan dhe një protestë para ministrisë, MASR thotë se studentët duhet të drejtojnë ankesën e tyre universiteteve.

“Shqetësimin e studentëve e mirëkuptojmë duke marrë parasysh që jo çdo lëndë është zhvilluar në të njëjtin nivel qëkur mësimi ka kaluar online. Ankesat e disa studentëve që na kanë ardhur në ministri për departamente apo lëndë të caktuara, ne i kemi dërguar menjëherë në universitete duke u kërkuar që të marrin masa për akomodimin e tyre dhe kthyer ata nëpër auditorë, gjithmonë në respektim të rregullave të distancimit fizik dhe kushteve higjieno-sanitare me qëllim realizimin e konsultimeve të nevojshme para provimeve. Theksojmë se ky është një proces që duhet të ndodhë në çdo IAL. Studentët duhet të çojnë atje ankesat për lëndë specifike në mënyrë që universiteti të akomodojë ata studentë që kanë hasur vështirësi me mësimin online duke u ofruar leksione shtesë“ thuhet në reagimin e ministrisë

LEXO EDHE  Aksidenet në aksin Korçë-Pogradec, shoferi përplas këmbësoren dhe largohet nga vendngjarja

MASR shton se ka shlyer që në janar detyrimet financiare ndaj të gjithë IAL-ve nga buxheti i shtetit. Ministria kujton se përkundër dëmeve dhe kostove të shkaktuara nga tërmeti i 26 nëntorit dhe pandemia COVID-19,  ka bërë alokimin e fondeve pranë Institucioneve të Arsimit të Lartë (IAL-ve) për subvencionimin e përgjysmimit të tarifave dhe bursat për ekselentët (për mbi 90% të studentëve); duke negociuar me bashkitë për çështjen e pagesës së konvikteve; si dhe duke kontribuar në vendimin për shtyrjen e qerasë së studentëve gjatë periudhës së pandemisë.