Një person është vënë në pranga lidhur me ngjarjen e ndodhur pas mesnatës së 14 Qershorit në periferi të Tiranës, ku ndaj një kompleksi u qëllua me armë zjarri. Burime zyrtare nga policia bënë me dije se personi i vënë në pranga, Gëzim Haroku, është anëtar i një grupi kriminal. Në banesën e këtij të fundit në Yrshek, është gjetur një arsenal armësh.
Arrestimi
Policia njoftoi se pas ngjarjes, u siguruan informacione në rrugë operative se armët e përdorura dhe motomjeti me të cilin ishin larguar autorët ndodheshin në banesën e 36-vjecarit. Po në bazë të informacioneve të marra në rrugë operative dyshohet se bashkautor në këtë ngjarje është edhe shtetasi Erigers Mihasi.
Gjithashtu, dyshohej se banesa e Gëzim Harokut mund të përdorej si bazë për të fshehur armët dhe municionet luftarake të grupit kriminal.
Bazuar në këto informacione, shërbimet e Komisariatit të Policisë Nr. 6, të mbështetura nga Forca e Posaçme “Shqiponja”, organizuan dhe finalizuan operacioni “Yrsheku”, në kuadër të të cilit u vu në pranga Gëzim Haroku dhe u shpall në kërkim Erigers Mihasi.
Arsenal armësh në banesë
Gjatë kontrollit të ushtruar në banesën e Gëzim Harokut, shërbimet e Policisë zbuluan një arsenal armesh dhe municionesh që përdoreshin nga një grup i strukturuar kriminal, pjesë e të cilit ishte edhe Haroku.
Në cilësinë e provës materiale janë sekuestruar 15 armë zjarri (1 mitraloz i lehtë, 7 kallashnikovë, 3 pistoleta, 2 armë automatike MP7, 1 pushkë me dylbi dhe 1 armë gjahu), 10 granata dore, 10 detonatorë, 10 kallëpe me tritol dhe fitil zjarrpërcjellës, një sasi fishekësh, një automjet dhe dy motorë sportivë.
“Në drejtimin e Prokurorisë vijon puna për zbardhjen e plotë të kësaj ngjarjeje, identifikimin e pjesëtarëve të tjerë të këtij grupi kriminal dhe dokumentimin e veprimtarisë kriminale të këtij grupi”, njoftoi policia.
