Kryeministri Edi Rama ka reaguar lidhur me rezolutë e fundit të miratuar nga Parlamenti Europian, ku ndër të tjera vihet theksi te 15 kushtet që duhen plotësuar nga Qeveria Rama, përpara uljes në tryezën e bisedimeve me BE-në për negociatat.
Por Kreu i Qeverisë nuk pranon ekzistencën e 15 kushteve, madje sulmon opozitën dhe aleatët e saj në Parlamentin Europian, PPE-në.
Përmes një postimi në Twitter, Rama shkruan se nuk ka 15 kushte për uljen në tryezë me BE sepse 7X7 s’bëjnë 42 në asnjë vend të botës!
Gjithashtu ai thekson se ata që kapen pas kësaj 15-ës do mbeten në opozitë.
“Po mirë, kur paska 15 kushte për nisjen formale të negociatave për anëtarësim, për çfarë duhej kjo rezoluta e partive aleate të PD në Parlamentin Europian që u votua pa konsensus?
E pra, nuk ka 15 kushte për uljen në tryezë me BE, sepse 7X7 s’bëjnë 42 në asnjë vend të botës!
Dhe nëse pastaj kjo 15-ta duhet për politikë e prandaj bashkohen kushtet e fillimit me ato të vijimit, atëherë nuk janë 15 po janë 15X100 kushte më shumë për t’u plotësuar deri ditën e anëtarësimit! Po një gjë është e sigurtë: Këta që kapen pas kësaj 15-ës do mbeten në opozitë”, shprehet Rama.
Një ditë më parë Parlamenti Europian miratoi amendamentin e grupit të Partive Popullore Europiane, që thekson kushtet që duhet të përmbushë Shqipëria përpara se të ulet në tryezën e parë ndërqeveritare BE-Shqipëri.
