Parlamenti Europian miratoi sot një rezolutë që përkrah integrimin e antarësimin në BE të Ballkanit Perëndimor.
Ish deputeti Genc Pollo thotë se “aty shprehet mbështetja për çeljen e negociatave me Shqipërinë por pëmenden edhe 15 kushtet që i janë caktuar qeverisë Rama nga Bashkimi Europian në mars të këtij viti”.
Sipas Pollos, propozimi i theksimit të këtyre 15 kushteve erdhi nga grupi parlamentar kryesor që është ai i Partisë Popullore Europiane dhe u përkrah nga grupe të tjera e shumë deputetë të veçantë, të majtë e të djathtë, me një shumicë solide (56%) në plenare.
“Unë duhet të falenderoj si shumicën pro 15 kushteve ashtu edhe të gjithë eurodeputetët që votuan prorezolutës në tërësi”, thekson Pollo.
Në një postim në rrjetet sociale, ish-deputeti thotë se kryeministri Edi Rama duhet të ndërpresë një orë e më parë mohimin e ekzistencës së këtyre kushteve, e të pranojë ekzistencen e tyre.
“Mendoj se ka një konsensus në opinionin publik shqiptar se përmbushja e 15 kushteve është kyç për restaurimin e normalitetit demokratik e kushtetues në vendin tonë.
Pra lipset mirënjohje për miqtë europianë që na ndihmojnë me dashamirësi. Më e pakta që mund të bëjmë është që të apelojmë njëzëri që zoti Rama të ndërpresë një orë e më parë mohimin e ekzistencës së këtyre kushteve, të pranojë me gojën plot ekzistencen e tyre dhe të tregojë në se është në gjendje të japë kontribut për përmbushjen e tyre.
Këtë pres të degjoj prej tij pavarësisht nga dyshimet e mija nëse don e nëse mundet”, shkruan Pollo.
