Formula për Komisionin Qendror Zgjedhor duket se po mban peng draftin final për zgjedhoren në Këshillin Politik. Palët ndahen te mënyra e përzgjedhjes së anëtarëve në të tre organet e KQZ.
Ish-kreu i KQZ-së, Kristaq Kume, në emisionin “Repolitix” ka sqaruar përplasjen në tryezën e Këshillit Politik ku sipas tij, opozita kërkon vendimmarrje të cilësuar, ndërsa mazhoranca nuk kërkon të anashkalojë Kuvendin.
“Në 5 qershor palët kanë rënë dakord që komisioneri i zgjedhjeve të jetë një ndër aplikuesit, i cili veç të tjerave duhet të marrë dokordësinë e palëve.
Kurse sa i takon dy strukturave të tjera të KQZ, në ndryshim nga varianti që ka qenë i përgatitur nga ekspertët është shtuar që KAS, struktura që do merret me gjykimin e apelimeve të jetë me 5 anëtarë.
Në këtë marrëveshje janë dakordësuar që përbërja të pasqyrojë propocionlitetin politik. Kjo do të thotë që 3 të jenë të mazhorancës dhe dy të opozitës. Ajo që ka kërkuar PD dhe LSI ka të bëjë me procedurën që duhet ndjekur për të arritur deri në përzgjedhjen e atyre që do shkojnë deri në Kuvend për të marrë votat për tu emëruar në detyrat përkatëse.
Ajo çka synon të realizojë opozita është të mundësohet realisht efekti dhe roli që duhet të ketë ajo në rolin e kandidatëve. Ky është një problem,jo i vogël.
E dyta opozita ka kërkuar që mandati mos jetë ashtu siç është parashikuara në variantin e propozuar, por komisioneri të ketë mandat 4 vjeçar ndërsa dy strukturat e tjera mandat 6 vjeçar. Shumë më e rëndësishme sesa zgjatja e mandatit është kërkesa e opozitës që vendimmarrja në këto komisione të jetë vendimmarrje e cilësuar.
Kjo do të thotë që strukturat përkatëse mund të marrin vendime nëse bien dakord 4 anëtarë të saj. Këto ka kërkuar opozita jashtë parlamentit.
Mazhoranca thotë se gjithë kjo, do të bëhet si përgjegjësi e Kuvendit. Pra do të jetë Kuvendi që do shpallë aplikimin, do mbledhë dosjet dhe do të jetë një komision i Kuvendit që do shqyrtojë kandidaturat.
Kjo do të thotë që të gjithë anëtarët e komisionit të jenë me vullnetin e mazhorancës aktuale. Kjo është e papranueshme nga opozita”, sqaroi Kume.
