Drejtuesi i Institutit të Studimeve Politike dhe analisti i A2, Afrim Krasniqi, foli në Dita Jonë në lidhje me financimet e partive politike nga taksat e shqiptarëve.
“Ka dy financime që ne u bëjmë partive politike. Së pari, është financimi vjetor kur nuk ka periudhë zgjedhore dhe tjetri është financimi që bëhet në periudhën zgjedhore. Për shkak se në Shqipëri kemi zgjedhje një herë në dy vjet, praktikisht një herë në dy vjet kemi dyfishim të buxhetit të partive politike, që shkon në total në rreth 6 milionë euro. Për shkak se vitet e fundit ne kemi filluar të shikojmë fushata edhe pa kandidatë rivalë, duhet të ruhej ky buxhet. Por, i gjithë buxheti ka kaluar për partitë kryesore, për ato që morën pjesë. Ky është një burim i ligjit të partive dhe kodit zgjedhor. Po marr një tjetër lloj financimi që nuk flet askush, me ligjin e partive politike, partitë kanë seli falas në 12 qarqet e Shqipërisë. Ne jemi nga vendet e pakta në Evropë që u japim partive seli falas.
Krasniqi foli edhe për parti fiktive, të cilat shndërrohen në biznes dhe për këtë mori edhe një shembull. “Parti fiktive, për shkak se marrin financim fiktiv, e shndërrojnë këtë në biznes. Në zgjedhjet e kaluara parlamentare kemi parë një parti, për shembull PSD-ja, e cila bëri një marrëveshje, iu kalua një biznesmeni, i cili e mori atë si me qira dhe partia tani vazhdon paguhet vetëm për këtë arsye dhe ky është një paradoks i madh”.
Krasniqi thekson se u deshën vetëm 3 minuta diskutim për të arritur një konsensus të plotë për të trefishuar buxhetin e partive politike. “Referuar rezultatit të zgjedhjeve të kaluara financimi për Partinë Socialiste do të trefishohet dhe në varësi nga rezultati i zgjedhjeve të ardhshme përsëri do të ketë një buxhet të ri, herë 3. Ky është kompromisi për të cilin u deshën vetëm 3 minuta për ta arritur, pati konsensus të plotë. Bëhet fjalë për një vend në krizë dhe ky është paradoksi i madh”.
Por ku shkojnë këto para?
“Partitë kanë një armatë të madhe komisionerësh. Vetëm në zgjedhje, partitë e mëdha kanë deri në 20 mijë komisionerë. Këta individë nuk paguhen vetëm nga KQZ, por edhe nga partitë. Së dyti, partitë paguajnë edhe stafe elektorale, të cilat janë të padukshme dhe të pamatshme. Vetëm në SHBA, partitë shqiptare kanë paguar mbi 2 milionë euro vetëm në 5 vitet e fundit”./A2New.com
