Drejtoresha e Përgjithshme e Tatimeve, Delina Ibrahimaj, u shpreh në “A2 Business Week” se kriza e koronavirusit ka nxjerrë pa punë 38 900 persona. Kjo shifër, shtoi Ibrahimaj, i referohet vetëm biznesit të madh.
“Nga të dhënat deri në muajin prill, ka 38 900 punonjës më pak në listë-pagesë në krahasim me muajin shkurt, kur situata ka qenë normale. Sektorët që janë prekur më shumë janë ai i prodhimit dhe ai i shërbimit. Kjo është një shifër që i referohet biznesit të madh, pasi biznesi i vogël i jep deklaratat e listë-pagesave një herë në 3 muaj dhe numrin e saktë të papunëve për këtë periudhë do ta kemi vetëm rreth datës 20 korrik”, theksoi Ibrahimaj.
Ajo sqaroi se “janë gjithsej 1204 biznese që nuk kanë aplikuar për pagën e luftës për punonjësit e tyre”.
“Qeveria mendoi që pagat e luftës të kalonin direkt tek të punësuarit, me qëllim që të garantonte marrjen e kësaj mbështetjeje. Do të kishte qenë shumë më e lehtë që fondet t’i kaloheshin direkt biznesit, por gjurmimi i shpenzimit të këtyre fondeve do të kishte qenë shumë i vështirë dhe jam e bindur që nuk do të arrihej rezultati në kohën që u arrit. Ne kemi shumë ankesa për bizneset që nuk aplikojnë dhe që kërkojnë para mbrapsht nga paga e luftës.
Pra, qëllimi i qeverisë ishte që këto pagesa t’i shkonin individëve. Janë 1204 biznese që nuk kanë aplikuar për pagën e luftës për punonjësit e tyre, që janë 7176 individë. Ne i dhamë mundësi bizneseve që nëpërmjet një formulari të tregonin arsyet pse nuk aplikonin dhe arsyeja kryesore ka qenë se individët ishin paguar 100%. Ne kemi krijuar një grup pune i cili po verifikon 1204 rastet. Në përfundim të verifikimeve, ne do të vijojmë me penalizimet e bizneseve”, deklaroi Ibrahimaj.
Kur u pyet se sa kohë duhet që të kalojë paga e luftës te individët për të cilët nuk ka aplikuar biznesi, por që aplikojnë vetë, Ibrahimaj tha: “Ne kontrollojmë plotësimin e formularëve nga individët dhe të nesërmen bëjmë pagesën. I gjithë ky proces do të përfundojë brenda muajit qershor”.
