Lewandowski synon “Topin e Artë”: Ende nuk e kam arritur kulmin tim

Robert Lewandowski thotë se “Topi i Artë” nuk është fokusi i tij por se “gjithçka është e mundur” kur bëhet fjalë për fitimin e çmimit. Sulmuesi polak gjithashtu insiston se vitet e tij më të mira si futbollist janë përpara tij.

Sulmuesi i Bayern Munich nuk ka qenë asnjëherë në tre të parët për çmimin më prestigjioz individual të futbollit. Rekordi i tij më i mirë në këtë drejtim i përket vitit 2015, kur u rendit i katërti.

31-vjeçari ka të ngjarë të jetë potencialisht në garë për edicionin e vitit 2020 të këtij çmimi, sepse ka shënuar 45 gola në të gjitha garat për bavarezët, që janë fare pranë sigurimit të një tjetër titulli në Bundesligë. “Unë isha në ceremoninë e ndarjes së çmimeve dhjetorin e kaluar, – tha Leëandoëski për “France Football”. – Do të shohim çfarë mund të ndodhë në vazhdimësi. Ajo që përpiqem të bëj është të tregoj gjithmonë më të mirën nga vetja, të fitoj trofe dhe të shënoj sa më shumë gola. Por, mua më interesojnë më shumë trofetë kolektivë, ato janë gjëja më e rëndësishme.”

“Unë as mendoj për “Topin e Artë”, edhe pse, në jetën time, besoj se çdo gjë është e mundur. Nuk jam ende në periudhën më të mirë të karrierës time. Kam besim se momenti më i mirë i karrierës sime do të vijë shpejt. E di se nuk është kjo kontrata e fundit. Dua të luaj sa më gjatë dhe të ruaj formën optimale sportive. Kam gjithë kohën para meje, që të mendoj për të ardhmen. Ndihem vërtet mirë. Unë do të festoj ditëlindjen e 32-të në gusht, por kjo nuk do të thotë se ndjehem i kësaj moshe. Ajo që dua nuk është vetëm të qëndroj në krye për dy ose tri vitet e ardhshme, por në një afat më të gjatë”.

LEXO EDHE  U votua si lojtari më i mirë në Serie A, Paulo Dybala i falënderon të gjithë