Pas humbjes së Tiranës mbrëmjen e djeshme kundër Teutës në “Niko Dovana” tashmë diferenca mes bardhebluve dhe klubit të Kukësit është shkurtuar në 6-të pikë. Tashmë sulmuesi i Kukësit, Emiljano Musta, beson se pas humbjes së fundit të Tiranës me Teutën, verilindorët mund të arrijnë të parakalojnë bardheblutë.
“Gara për titullin kampion – “Jemi 6 pikë pas Tiranës. Tani presioni është më i madh në krahun e tyre. Kjo është javë vendimtare sepse luajmë me një kundërshtar të fortë si Laçi në fushën e tij. Nëse nuk fitojmë ndeshjet tona, nuk ka rëndësi sa largohemi apo sa e shkurtojmë distancën me Tiranën. Patjeër që shpresojmë te titulli kampion. Nëse nuk do të besonim, nuk do të zbrisnim në fushë. Atmosfera në skuadrën tonë është e mirë. Përpiqemi të japim maksimumin, ndjekim këshillat e trajnerit. Presidenti na mbështet.
Kemi ndeshje të forta, si Tirana dhe ne. Tirana ka derbin, luan me ne, pastaj, shkon në Korçë. Ne kemi ndeshje me Laçin. Shpresojmë që mbi të gjitha të bëhet kampionat i bukur dhe ta shijojnë spektatorët nga televizori. Objektivi është të dalim kampionë dhe e besojmë. Kampionat bëhet akoma më i bukur kur luftohet në çdo zonë: mbijetesë, Europë dhe tituli.
Ne bëjmë llogaritë tona, por nëse nuk marrim 100% të ndeshjeve, është e kotë. Shpresojmë të gabojë sa më shumë Tirana dhe ne do të jemi aty gjatë gjithë kohës”, përfundoi futbollisti i Kukësit Emiljano Musta.
