Anëtarja e Këshillit Politik, Rudina Hajdari, ka braktisur pas dy orësh diskutime tryezën e sotme të Këshillit, me argumentin se s´mund të bëhej pjesë e pazareve mbi tenderin e identifikimit biometrik.
Ajo tha se do të vazhdojë në Kuvend betejën për ndryshimin e sistemit dhe shtoi se nuk do të kthehet më në atë tryezë për ndarjen e tenderave.
“Mbledhja nuk ka përfunduar akoma, por po shpenzojmë dy orë për tenderin e identifikimit biometrik. Unë nuk kam ardhur këtu për të parë si do e ndajnë këta tenderin. Është e pamundur të flitet për ndryshimet që presin shqiptarët. Qytetarët nuk presin që ne të caktojmë se kush do e marrë këtë tender. Unë u largova nga ky takim”, tha Hajdari.
Në vijim ajo shtoi se ka si synim ndryshimin e sistemit dhe nuk mund të rri në një këshill që nuk merret me ato që kanë rëndësi për qytetarët.
“Beteja në parlament do të jetë për t’i dhënë besim qytetarëve shqiparë dhe të mos merremi me tendera pas dyersh. Të rrish dy orë për të zgjidhur nëse tenderimi do bëhet me shpallje apo po shpallje. Unë prandaj dola dhe sa herë të flitet për tendera unë nuk bëhem pjesë”, tha Hajdari.
Ajo tha se pavarësisht se ka firmosur marrëveshjen zgjedhore, nuk do e votojë atë në Kuvend.
