Ministrja e Shëndetësisë, Ogerta Manastirliu, tha se shtimmi i rasteve me Covid-19 ishin të pritshëm për shkak të hapjes, por edhe për shkak të mosrespektimit të protokolleve të sigurisë.
Manastirliu tha se testet bëhen kur ka një hetim epidemiologjik, duke shtuar se shtimi i rasteve s´ka të bëjë me rritjen e numrit të testimeve.
“Përgjatë dy javëve të fundit kemi pasur grumbullime, festa familjare, ceremoni mortore, që do të thotë se nuk janë respektuar rregullat dhe protokollet e sigurisë. Nuk diskutohet që ka raste edhe në institucione”, tha Manastirliu, e cila theksoi se “duhen mbajtur maskat kur nuk respektohet distancimi fizik, duhet të ruhet higjena personale”.
Ajo tha se në Tiranë, Shkodër dhe Durrës ka një transmetim komunitar.
E pyetur në Opinion lidhur me vatrën në QSUT, Manastirliu tha se përgjegjësia jonë është që personeli shëndetësor të jetë i mbrojtur.
“Ne rihapëm sistemin shëndetësor, spitalet janë struktura që nuk shkojnë personat e shëndetëshëm, por edhe ato që mund të jenë të infektuar. Nuk është një fenomen që ka ndodhur vetëm në Shqipëri, por ka ndodhur në Gjermani, Itali, Spanjë”, tha ajo.
Sipas saj, do të jemi të rrezikuar nëse nuk respektohen protokollet e sigurisë.
“Ne kemi disa skenarë për të aplikuar në rast se do të ketë më shumë persona që do të shtrohen në spitale. Infektivi ka 120 shtretër, sot janë të shtruar 50 persona. Në total të 4 spitalet Covid-19 kanë 550 shtretër”, tha Manastirliu.
Sipas saj, ne duhet të jetojmë me rregullat të reja, pra duket respektuar ato që tashmë dihen, distancimin social, higjenën personale apo maskat në vendet e mbyllura.
“Për momentin nuk mund të thuhet se mund të kthehemi në një karantinë totale”, tha Manastirliu.
