VIDEO/ Eurot në Portin e Durrësit, Policia: U sekuestruan rreth 500 mijë €

Policia e Shtetit, nëpërmjet një njoftimi zyrtar për mediat, bën me dije se shuma e eurove të sekuestruara në Portin e Durrësit, kap shifrën e 498.850 mijë €.

Fillimisht në media u raportua se shuma e sekuestruar në Portin e Durrësit, ishte mbi 1.8 mln €, por nuk dihej shifra e saktë, pasi thuhej se paratë po numëroheshin nga autoritetet përkatëse.

Në lidhje me sekuestrimin e parave, në kamionin i cili vinte nga Bari/Itali, është arrestuar drejtuesi i mjetit të tonazhit të rëndë, 56-vjeçari Andon Thanasi.

Njoftimi i Policisë:

Port, Durrës

Kontrolle të shtuara, si në dalje, ashtu dhe në hyrje, për të parandaluar dhe goditur paligjshmërinë.

Bashkëpunimi i shkëlqyer i strukturave doganore dhe policore çoi në evidentimin dhe sekuestrimin e një sasie të madhe valute në euro, gjithsej 498.850

Vihet në pranga drejtuesi i kamionit që transportonte shumën e eurove.

Si rezultat i shtimit të kontrolleve, në hyrje të RSH-së, në vijën e dytë, bazuar edhe në analizën e riskut të bërë nga strukturat doganore, në bashkëpunim me Policinë Kufitare, u ndalua mjeti kamion tip “Renault”, me drejtues A. Th., 56 vjeç, banues në Tiranë.

LEXO EDHE  Asnjë humbje jete, ja sa raste të reja me Covid u zbuluan në Kosovë

Në urën lidhëse të kamionit dhe rimorkios, pas skanimit dhe kontrollit u gjetën të fshehura disa pako të mbështjella, brenda të cilave kishte vlera monetare në euro, të padeklaruara.

Menjëherë është njoftuar grupi hetimor dhe specialistët për Hetimin e Krimit Ekonomik e Financiar në DVP Durrës.

Drejtuesi i kamionit është shoqëruar në DVP Durrës, për veprime të mëtejshme, ndërsa pakot e mbushura me euro u sekuestruan dhe në përfundim të numërimit nga grupi hetimor dhe i filmuar me kamera i gjithë procesi i numërimit rezultoi se në to kishte 498.850 euro.

Në përfundim të veprimeve të para hetimore u bë arrestimi në flagrancë i shtetasit A. Th., 56 vjeç, banues në Tiranë, për veprat penale “Pastrimi i produkteve të veprës penale ose veprimtarisë kriminale” dhe “Mosdeklarimi në kufi i të hollave dhe i sendeve me vlerë”.

Nën drejtimin e Prokurorisë së Rrethit Gjyqësor Durrës, shërbimet e Policisë Kufitare, ato doganore dhe specialistët për Hetimin e Krimit Ekonomik e Financiar në DVP Durrës, po vazhdojnë hetimet për zbardhjen e plotë të kësaj ngjarjeje.