Ish-ministri i Drejtësisë, Ylli Manjani, e konsideron hetimin për shembjen e Teatrit Kombëtar si testin e parë të vërtetë për SPAK. Manjani shkruan në rrjetet sociale se me shembjen e godinës ka ndodhur një krim i rëndë, të paktën ndaj pasurisë publike, në mos ndaj trashëgimisë historike.
“Ka ndodhur një shpërdorim klasik i detyrës publike. Kanë ardhur pasoja me dëme të rënda financiare, nga sjellja antiligjore e disa personave njëkohësisht. Dikush duhet të përgjigjet. Dukshëm janë persona me pushtet qendror e vendor që përpiqen të luajnë pingpong përgjegjësish. Por ligjet janë të qarta dhe, janë dhunuar po aq qartë. Ky është testi i vërtetë për SPAK”, shkruan Manjani.
Në postimin e tij, ish-ministri i Drejtësisë ngre disa pyetje, nëse SPAK ka mundur të sekuestrojë ndonjë dokument, kush e kishte në inventar godinën, kush vendosi zyrtarisht për shembjen, kush e thirri policinë dhe RENEA-n për ndihmë.
Postimi i Ylli Manjanit
Nejse, ku e lamë?
Te shembja barbare e Teatrit Kombëtar.
Nuk e di, arriti SPAK të sekuestrojë ndonjë dokument?!
Kush e kishte në inventar atë godinë? A u transferua godina sipas inventarit në Bashki? Ku është fizikisht aseti i inventarizuar?
Po drejtori i Teatrit di gjë për këtë punë? Në mos ai, shefi/shefja i financës apo dikush nga administrada e drejtorisë?
E ekziston ende ligjërisht drejtoria e Teatrit Kombëtar? Nëse po, ku e marrin rrogën? Ku luajnë teatër? Çfarë asetesh kanë e ku i kanë ato fizikisht?
Kush vendosi zyrtarisht shembjen?
Ku është akti i shembjes?
Si u vendos shembja pa patur një projekt zhvillimi të konsultuar e miratuar zyrtarisht?
E kujt ishte fadroma? Me urdhër të kujt u vu në lëvizje?
Po materialet brenda godinës në cilin inventar ishin? Ku janë ato fizikisht?
Kush e thirri policinë dhe Renean për ndihmë?
Kush dha urdhër për dhunë policore ndaj njerëzve?
Kush e plagosi Alfred Lelën? Po atij studentit të arteve kush ja vuri këmbë e gjunj në kokë?!
Po të shoqëruarit përdhunisht në komisariate si u trajtuan?
Po i presim përgjigjet e këtyre pyetjeve dhe përgjegjësit përkatës.
Ka ndodhur një krim i rëndë të paktën ndaj pasurisë publike, në mos ndaj trashëgimisë historike.
Ka ndodhur një shpërdorim klasik i detyrës publike.
Kanë ardhur pasoja me dëme të rënda financiare, nga sjellja antiligjore e disa personave njëkohësisht.
Dikush duhet të përgjigjet. Dukshëm janë persona me pushtet qendror e vendor që përpiqen të luajnë pingpong përgjegjësish.
Por ligjet janë të qarta dhe, janë dhunuar po aq qartë.
Ky është testi i vërtetë për SPAK.
