Qeveria e cilësoi si sukses marrjen e 650 milionë eurove nga Eurobondi, dhe si sinjal të një besimi ndërkombëtar për situatën ekonomike shqiptare.
Por pedagogu dhe eksperti i ekonomisë Rezart Prifti duket skeptik. “Të ishte rast suksesi, nuk e di pse duhet të dështonte tre herë”, thotë ai.
“Kryeministri tha se me suksesin në bursën e Londrës, do të heqim edhe TVSH-në këtu. Kjo tregon se sa kryeministri e ka idenë për ekonominë, është si të thuash që sepse bie shi në Tajlandë të ndërtojmë Skavicën këtu, çfarë lidhje ka suksesi në Londër me bizneset këtu”, vijon Prifti.
Eksperti thotë se rritja e buxhetit për të nuk është një problem, e shqetëson më shumë ajo çfarë mendohet të bëhet me atë shumë. Projekti Shqipëria 2030” nuk e bind, dhe për këtë ai bën edhe një paralelizëm. “Dy vjet më parë, u shpall projekti 1 miliard dollarë. Të gjithë ekspertët po vinin vërdallë të merrnin informacione, unë arrij të marr në mënyrë konfidenciale materialin, që nuk ishte më shumë se 12 faqe. Nuk më hiqet ende shija e keqe”.
Heqja e shpallur e TVSH për bizneset e vogla nuk i duket zgjedhja e duhur. “Nga ana teknike unë jam që asnjë biznes të mos jetë jashtë skemës së TVSH-së, sepse krijon mekanizma abuzimi. Sipas mendimit tim TVSH duhet të ulej në 15%, por jo në vlerën nominale, në mënyrë që ajo të monetizohet nga qytetari dhe të komercializohet kuponi, duke shtuar interesin për të hyrë në atë skemë”, thotë ekonomisti për A2.
Ndërkohë, për sa i përket amnistisë fiskale, ai ndan vlerësimin në bazë të statusit social. “Si qytetar jam kundër. Deri më tani janë burgosur dhe dhunuar njerëz për 10 mijë lekë, për një gjobë bashkie, pse të falen tani? Si pronar i një biznesi të ndershëm, jam akoma më kundër. Në 5 vjet nuk kam vonuar një faturë, dhe kam marrë mbrapa vetëm presione, po më prisnin dritat në kohë pandemie, me lokalin mbyllur. Si ekonomist, jam dakord, por nuk di sa mund të realizohet realisht, në plan të parë se në këtë vend nuk ruhet sekreti, dhe nuk kemi institucione që mund të fillojnë një revolucion të tillë. Amnistia nuk bëhet për të ndershmin, por për miliardat që duhet të hyjnë në sistem”, thotë Prifti.
