Nga Boldnews.al
Në një kohë që Qendra Spitalore Universitare Tiranë (QSUT) ka dështuar në parandalimin e përhapjes së Covid-19 në radhët e mjekëve, brenda stafit drejtues të institucionit ka nisur një përplasje e hapur lidhur me tenderat e dyshimtë që po zhvillohen, sidomos ai për mirëmbajtjen e aparaturave mjekësore.
“Boldnews.al” mëson se paraditen e së Mërkurës ka dhënë dorëheqjen drejtoresha juridike e QSUT, M. Shehu.
“Përplasjet” për tenderin e aparaturave
Sipas burimeve konfidenciale, juristja nuk ka pranuar të nënshkruajë procedurën “urgjente” për tenderin e mirëmbajtjes së aparaturave mjekësore, një procedurë e ndjekur në mënyrë të detajuar nga redaksia.
Tenderi i mirëmbajtjes së pajisjeve mjekësore, me fond limit rreth 7 milionë euro, është shpallur në Shkurt 2020. Pas disa shtyrjeve, ai u anulua plotësisht në fillim të Qershorit, duke lënë pa kontrata mirëmbajtjeje të gjithë pajisjet mjekësore në QSUT.
“Boldnews.al” ka raportuar më herët mbi dyshimet se tenderi u shty qëllimisht nga drejtori i QSUT, Enkelejd Joti, për të krijuar një situatë “emergjente” dhe për të mbërritur tek një tender “urgjent”, i cili mund t’i akordohet një kompanie që nuk plotëson kriteret e nevojshme për të nënshkruar kontratë.
Dyshimet e ngritura nga “Boldnews.al” duket se po konkretizohen. Pas anulimit të tenderit të parë, Joti ka kërkuar rishpalljen e tenderit, por kësaj radhe me procedurë “urgjente”, duke argumentuar se aparaturat mjekësore janë “në mëshirë të fatit”.
Kjo kërkesë e Jotit, sipas burimeve të redaksisë, është refuzuar nga drejtoresha juridike, e cila ka dorëzuar dorëheqjen.
M. Shehu është drejtoresha e dytë juridike e QSUT që jep dorëheqjen brenda një muaji e gjysëm.
Në Mars 2020, drejtuesja e mëparshme e sektorit juridik dha dorëheqjen, për të cilën burimet brenda stafit e lidhnin pikërisht me procedurat e ndjekura për tenderin e aparaturave mjekësore.
Gjithësesi, ish-drejtoresha juridike, D. D, deklaroi se dorëheqja e saj në Mars 2020 nuk kishte lidhje me tenderin e aparaturave.
Mjekët me Covid
Krahas dorëheqjes, drejtuesit e QSUT duket se kanë dështuar edhe me menaxhimin e përhapjes së pandemisë brenda bluzave të bardha.
“Boldnews.al” mëson se, së fundmi, kanë rezultuar pozitiv me Covid-19 një mjek në Shërbimin e Urgjencës, me iniciale P.Gj, si edhe dy infermierë po aty, me inicialet D.Sh. dhe M.B.
Këto raste vijojnë të mbahen “të fshehura”, me shumë mundësi, nën tentativën për të ulur shifrat e dështimit në menaxhimin e QSUT.
Skandali/ Joti i QSUT vonon tenderin e mirëmbajtjes, prishen aparaturat mjekësore (Lista)
