Kryeministri Edi Rama pas takimit me opozitën parlamentare u shpreh se reforma duhej të ishte bërë më parë duke garantuar marrëveshjen për kodin.
Më tej ai theksoi se me rëndësi është që të vazhdohet diskutimi, ndërsa shtoi se me këtë kod nuk shkohet dot në zgjedhje pasi sipas tij duhen bërë ndërhyrje për të garantuar instancën e ankimimit.
Mes të tjerash, kryeministri theksoi se në tryezën e diskutimit përfaqësuesit e opozitës parlamentare kanë hedhur akuza se ka tentativa për blerjen e tyre si nga opozita jashtëparlamentare, ashtu edhe nga qeveria.
“Akuzat ishin në bllok për ata që janë jashtë por edhe në adresën tonë dhe u sigurova se ne nuk do shkojmë në rrugën e një zgjidhje ku thjesht do kërkojmë aritmetikën por në rrugën e diskutimit për të krijuar kushtet e një dakordësie dhe në asnjë mënyrë nuk do të përdoret.
Sigurisht që ne këtu jetojmë dhe qasja për të gjetur një marrëveshje lehtësuese dhe qetësuese për kryetarin e opozitës kishte synimin që të gjithë të jenë të përfshirë dhe të jenë të gatshëm të hyjnë në ballafaqim me zgjedhësit. Ka një opinion të gjerë që mendon se hapja e listave ka një efekt çudibërës por unë nuk e besoj këtë sepse mendoj që nuk ka sistem më demokratik se tjetri.
Këta njerëz që janë në parlament vijojnë nga listat e partisë demokratike. Kjo do të ishte si të thuash adresa e votës. Unë e kuptoj shumë mirë që diskutimi është legjitim, ja u kujtova zotërinjve që kjo reformë duhej bërë më parë, me dy shkallë, duhej fillimisht marrëveshja për kodin. Me këtë kod nuk shkojmë dot në zgjedhje sepse sidoqoftë ka nevojë për disa ndërhyrje ku më kryesorja është ndërhyrja që minimumi duhet të sigurojmë instancën e animimit.
Për këtë arsye duhet të kemi dhe konsensusin e opozitës parlamentare. Ne kemi dakordësuar një marrëveshje, nuk është marrëveshja që unë dhe PS do donte por duke qenë se synimi kryesor i asaj tryeze ishte hapja e dialogut dhe krijimi i mundësive për opozitën jashtëparlamentare, atëherë ne pranuam që mbasi topi shkoi në fushën e Lulzim Bashës dhe nuk po dukej gjëkundi. Ne duam që opozita parlamentare të kuptojë se ne jemi palë në atë marrëveshje. Ne atë marrëveshje nuk mund ta kundërshtojmë apo ta përmbysim, jemi këtu për ta kaluar. Ne jemi midis dy zjarreve”.-tha Rama.
