Kreu demokrat Lulzim Basha ka thirrur sot një mbledhje të Kryesisë së PD, dy ditë pasi Këshilli Politik arriti një marrëveshje me 12 pika për reformën zgjedhore.
Mbledhja e Kryesisë do të mbahet në orën 11:00 në selinë e PD, ndërsa pritet që kreu demokrat t´i informojë anëtarët mbi procesin e negociatave dhe arritjen e marrëveshjes.
Gjithashtu Kryesia pritet të miratojë ngritjen e një Grupi Ekspertësh për plotësimin e kuadrit ligjor për zbatimin e marrëveshjes.
Nga marrëveshja e arritur në Këshillin Politik, në zgjedhjet e ardhshme do të aplikohet identifikimi biometrik i zgjedhësve, një kërkesë kjo e demokratëve, që sipas tyre do të parandalojë një prej manipulimeve në zgjedhje, atë të votimeve fiktive.
Ndërkohë që administrata zgjedhore do të vijojë të jetë e politizuar, sistemi zgjedhor nuk pritet të ndryshojë.
Mbledhja e Kryesisë së PD konsiderohet formale, pasi edhe grupi i ekspertëve që pretendohet të ngrihet ka nisur nga puna prej kohësh, duke qenë pjesë e Këshillit Politik.
