Bayern Munich u duk se do ta kishte të vështirë ndaj Bayern Leverkusen, por nuk po rezulton kështu pasi bavarezët e kanë mbyllur pjesën e parë në avantazh 1-3.
Fillimisht ishin vendasit ata që shënuan të parët, duke dhënë përshtypjen e një ndeshje të vështirë për kampionët e Bundesligës. Alario i dha avantazhin skuadrës së tij në minutën e 10-të i cili nuk fali pas pasimit të mirë nga Baumgartlinger.
Baraspesha u rikthye në minutën e 28-të, ku autor i golit ishte Kingsley Coman. Francezi realizoi pas një topi të marrë nga Leon Goretzka.
Përpara se të dëgjohej fishkëllima për përfundimin e pjesës së parë, Bayerni do të shënonte edhe dy gola të tjerë. Avantazhin fillimisht e morën me golin e Goretzkës në minutën e 42-të pas një asisti të Thomas Muller. Gjuajtja e Goretzkës u ndihmua dhe nga gabimi i portierit vendas që nuk e largoi si duhet. Si të mos mjaftonte goli i 1-2, ishte Gnabry që shënoi dhe golin e tretë për 1-3.
Ai gjeti rrjetën në minutën e parë shtesë të pjesës së parë. Gjermani nuk gaboi pas asisitit të Kimmich nga porta në portë.