Edhe pse në shumë vende të botës kanë filluar masat lehtësuese pas COVID-19, Organizata Botërore e Shëndetësisë u bën thirrje qytetarëve të vazhdojnë të ruajnë vetveten dhe të respektojnë masat e sigurisë.
Sipas organizatës, shumë vende që kanë lehtësuar masat, kanë parë rritje të numrit të të infektuarve. Zëdhënësja e OBSH, Margaret Harris deklaroi se tanimë epiqendra e pandemisë janë vendet e Amerikës Qendrore, Jugore dhe Amerikës Veriore – veçanërisht Shtetet e Bashkuara. Ajo paralajmëroi se lufta kundër COVID-19 nuk do të marrë fund, deri sa të mos ketë virus në asnjë vend të botës.
Ajo gjithashtu bëri thirrje për protestuesit në të gjithë botën që mbështesin lëvizjen “Black Lives Matter”, për të marrë masa paraprake, duke i nxitur ata të ruajnë distancën shoqërore, të lajnë duart dhe të mos prekin gojën, hundën dhe sytë.